Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Kaloi 42 vjet në burg për një vrasje që nuk e kreu dhe sapo u lirua u arrestua përsëri
PiranjatPërditësimi i fundit 13 Tetor 2025, 23:26
Familja e Subramaniam Ventham kishte pritur me padurim lirimin e të dashurit të tyre, i cili, pavarësisht protestave për dekada të tëra për pafajësi, kishte kaluar pjesën më të madhe të jetës si i rritur në burg për një krim që nuk e kishte kryer. Momenti i madh erdhi të premten, më 3 tetor, kur Ventham kaloi nëpër portat e një burgu në Pensilvani.
Dënimi i tij u shfuqizua disa javë më parë, raporton Miami Herald, pasi një gjykatë zbuloi se prokurorët kishin mbajtur të fshehura provat që do të rrëzonin akuzat kundër tij.
Por Ventham nuk arriti kurrë të kthehej në shtëpi sepse u kap nga oficerët e Shërbimit Amerikan të Imigracionit dhe Doganave ( ICE ) që po e prisnin dhe e arrestuan, duke vepruar në bazë të një urdhri të vjetër dëbimi, dhe u dërguan në një qendër për persona e dëbuar.
Ventham, i cili lindi në Indi, por mbërriti në Shtetet e Bashkuara kur ishte 9 muajsh, filloi odisenë e tij ligjore në vitin 1982. Ai u arrestua për vrasjen e mikut të tij, 19-vjeçarit Thomas Kisner. Prokurorët pretenduan se ai e kishte qëlluar Kisnerin me një pistoletë të kalibrit të vogël që nuk u gjet kurrë, duke u mbështetur kryesisht në prova rrethanore. Ai u dënua vitin pasardhës me burgim të përjetshëm pa lirim me kusht. Të gjitha apelet e tij në vitet që pasuan u refuzuan.
Ndërsa ishte në burg, Ventham ishte një i burgosur shembullor. Ai hartoi programe për shkrim-lexim, dha mësime për qindra të burgosur të tjerë që përpiqeshin të merrnin diplomat e shkollës së mesme dhe mori një diplomë masteri me korrespondencë me rezultate të shkëlqyera.
Çështja e tij u mor përsipër së fundmi nga Projekti i Pafajësisë së Pensilvanisë, një nga disa programe në Shtetet e Bashkuara që gjurmojnë gabimet e drejtësisë që mbajnë njerëz të pafajshëm në burg për vite me radhë. Avokatët e programit zbuluan prova të reja, duke përfshirë një raport të FBI-së që e minoi në mënyrë kritike të gjithë çështjen e prokurorisë.
Më në fund, në gusht, një gjyqtar pranoi provat dhe rrëzoi akuzën për vrasje. Ventham do të kishte qenë i lirë tani, por ICE kishte plane të tjera.
Agjencia, raporton Miami Herald, përmendi një urdhër të vjetër dëbimi që daton që nga vitet 1980, i cili lidhej me akuzën për vrasje, por edhe me një dënim të mëparshëm për drogë për Ventham (në moshën 19 vjeç, ai kishte pranuar fajësinë për qëllimin e shpërndarjes së LSD). Meqenëse po vuante një dënim me burgim të përjetshëm, ai nuk u deportua kurrë.
Ky urdhër i vjetër u ringjall së fundmin me planet e administratës ndaj emigrantëve të paligjshëm. Familja thotë se deportimi do të bëhet në një vend me të cilin Ventham nuk është aspak i njohur, pasi të gjithë të afërmit e tij jetojnë në SHBA dhe Kanada.
Ekipi ligjor i ish-të ndaluarit ka paraqitur një mocion për të rihapur çështjen e imigracionit dhe një kërkesë për të pezulluar deportimin e tij ndërsa mocioni është në pritje. Qeveria ka afat deri më 24 tetor për t'u përgjigjur. Përtej aspektit ligjor, është edhe një çështje njerëzimi, përfundon gazeta amerikane.
Meqenëse Ventham nuk u natyralizua kurrë zyrtarisht, dënimi i tij i mëparshëm për drogë e bën atë subjekt të deportimit sipas ligjit amerikan të imigracionit. Dënimi i gabuar për vrasje e mbajti atë nën mbikëqyrje shtetërore për dekada, duke ngrirë procesin e deportimit.
Me lirimin e tij nga akuzat, ICE argumenton se urdhri origjinal i deportimit tani mund të zbatohet, por për mbrojtësit e Ventham, logjika e agjencisë sfidon drejtësinë.
