Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
BOTA
"KFOR-i negocioi tërheqjen e Radoiçiç nga Banjska", si u arratis organizatori i sulmit terrorist nga Kosova?
M.B.Përditësimi i fundit 27 Maj 2024, 07:58
Milan Radoiçiç
KOSOVA- Sulmi ndaj Policisë së Kosovës në Banjskë, vitin e kaluar, tronditi komunitetin lokal dhe ndërkombëtar. Milan Radoiçiç, ish-nënkryetar i Listës Serbe, pranoi përgjegjësinë për organizimin e këtij sulmi të armatosur. Pasojat e sulmit vazhdojnë edhe sot, ndërsa autoritetet në Kosovë dhe organizatat ndërkombëtare po hetojnë shkaqet dhe përgjegjësitë për këtë akt të rëndë. Së fundmi lidhur me këtë ngjarje International Crisis Group ka dalë me një draft-raport, ku theksohet se KFOR ka negociuar për tërheqjen e paramilitarëve serbë nga Banjska.
“Nga frika e një gjakderdhjeje, KFOR-i negocioi tërheqjen e grupit në pyjet përreth, nga të cilat ata u shkrinë. Kosova beson se deri në 200 luftëtarë të tjerë ishin fshehur në atë kohë në pyllin e dendur midis Banjskës dhe kufirit serb”, thuhet në këtë raport, i cili u citua në komisionin për mbrojtje e siguri në Asamblenë e Përgjithshme të NATO-s të mbajtur dy ditë më parë.
Lidhur me gjetjet e këtij raporti ka reaguar misioni paqeruajtës i NATO-s në Kosovë, KFOR ku me anë të një reagimi publik thotë se raportimi është i pasaktë. Pasi u thirr për të përforcuar praninë e tij, KFOR-i thotë se u koordinua ngushtë me Policinë e Kosovës dhe misionin e BE-së për Sundimin e Ligjit (EULEX) për të rivendosur sigurinë në zonë. KFOR-i thotë se NATO ka mbajtur gjithmonë qëndrimin se faktet duhet të vërtetohen dhe autorët duhet të përballen me drejtësinë.
“Në asnjë moment KFOR-i nuk ishte i përfshirë në negociatat e supozuara. Dhuna që ndodhi në Banjska erdhi pas një sulmi kundër paqeruajtësve të KFOR-it në maj të vitit 2023, i cili rezultoi në plagosjen e 93 pjesëtarëve të KFOR-it, disa prej të cilëve pësuan lëndime të rënda”, thuhet në reagim.
