Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Ligjet ndërkombëtare e cilësojnë të paligjshme/ Ministri i Mbrojtjes i Izraelit zotohet: Do të ndërtojmë shtet hebre izraelit në Bregun Perëndimor
r.llPërditësimi i fundit 30 Maj 2025, 15:35
ministri
IZRAEL- Ministri i Mbrojtjes i Izraelit, Israel Katz, u zotua se do të ndërtojë një “shtet hebre izraelit” në Bregun e pushtuar Perëndimor. Këto deklarata ministri izraelit i bëri një ditë pasi Qeveria e Izraelit njoftoi për krijimin e 22 vendbanimeve të reja në territorin palestinez.
Vendbanimet izraelite në Bregun Perëndimor, që shihen si pengesë e madhe për një paqe afatgjatë, vazhdimisht dënohen nga Kombet e Bashkuara dhe cilësohen si të paligjshme sipas ligjit ndërkombëtar. Vendimi i së enjtes i Qeverisë izraelite po ashtu u përball me kritika të ashpra nga jashtë.
“Kjo është një përgjigje e vendosur ndaj organizatave terroriste që po tentojnë të dëmtojnë dhe dobësojnë kontrollin tonë ndaj kësaj toke dhe po ashtu është një mesazh i qartë për [presidentin e Francës, Emmanuel] Macron dhe bashkëpunëtorët e tij: ata do të njohin në letër shtetin palestinez, por ne do të ndërtojmë, këtu, në këtë tokë, një shtet hebre izraelit”, citohet të ketë thënë Katz, sipas një njoftimi të lëshuar nga zyra e tij.
“Ajo letër do të hidhet në koshin e plehrave të historisë dhe shteti i Izraelit do të lulëzojë dhe përparojë”, shtoi ai.
Këto deklarata ai i ka bërë gjatë vizitës në vendbanimin Sa-Nur në veri të Bregut Perëndimor. Kolonët nga Sa-Nur ishin evakuuar më 2005 si pjesë e mosangazhimit të Izraelit nga Gaza. Izraeli e ka pushtuar Bregun Perëndimor që nga viti 1967.
Gjatë një vizite në Singapor të enjten, presidenti francez, Emmanuel Macron, tha se njohja e një shteti palestinez, nën disa kushte, ishte “jo vetëm obligim moral, por edhe nevojë politike”.
Një konferencë ndërkombëtare, që synon ringjalljen e idesë të zgjidhje me dy shtete për konfliktin izraelito-palestinez, pritet të mbahet në qershor në selinë e OKB-së në Nju Jork.
Në prill, Macron kishte deklaruar se Franca mund ta njohë një shtet palestinez në muajin qershor.
Pas njoftimit të Izraelit për vendbanime të reja, Britania e cilësoi këtë lëvizje si “pengesë të qëllimshme” ndaj shtetësisë palestineze, ndërkaq zëdhënësi i shefit të OKB-së, Antonio Guterres, tha se ky vendim i shtyu përpjekjet për zgjidhjen me dy shtete “në drejtimin e gabuar”./REL
