Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
BOTA
"Situata kërcënon të bëhet gjithnjë e më kritike!" SHBA do që të zbatojë kritere më të rrepta për dhënien e vizave për studentët kinezë
M.B.Përditësimi i fundit 30 Maj 2025, 08:35
SHBA- Qeveria e SHBApo e ashpërson qëndrimin ndaj studentëve të huaj dhe dëshiron të revokojë vizat e studentëve kinezë që studiojnë në SHBA. Sekretari i Shtetit Marco Rubio njoftoi se departamenti i tij do të bashkëpunojë me Departamentin e Sigurisë Kombëtare "për të revokuar në mënyrë agresive vizat për studentët kinezë, veçanërisht ata që kanë lidhje me Partinë Komuniste ose që ndjekin studime kritike".
Për më tepër, kriteret e vizave për të gjithë aplikuesit nga Kina dhe Hong Kongu do të rishikohen dhe tani do t'u nënshtrohen një shqyrtimi më të rreptë. Aktualisht është e paqartë se sa studentë dhe në cilat disiplina do të preken nga revokimi i lejeve të tyre të qëndrimit dhe nëse mund të ketë përjashtime.
Pekini reagon me indinjatë
Ministria e Jashtme kineze tha se ka paraqitur një ankesë kundër revokimit "të pajustifikuar" të vizave. Një zëdhënës në Pekin tha se "qasja diskriminuese" e Uashingtonit zbuloi "gënjeshtrën e lirisë dhe hapjes" për të cilën SHBA janë mburrur gjithmonë. SHBA vazhdojnë të dëmtojnë reputacionin e tyre ndërkombëtar.
Sipas Institutit të Arsimit Ndërkombëtar (IIE), në universitetet amerikane për vitin akademik 2023/2024 u regjistruan afërsisht 277.000 studentë kinezë. Kina përfaqëson kështu grupin e dytë më të madh të studentëve ndërkombëtarë pas Indisë. Studentët ndërkombëtarë janë një burim i rëndësishëm të ardhurash për shumë universitete amerikane, pasi ata zakonisht paguajnë tarifa shkollimi dukshëm më të larta se studentët vendas.
Përshkallëzimi i konfliktit me universitetet amerikane
SHBA njoftuan së fundmi pezullimin e lëshimit të vizave studentore deri në njoftim të mëtejshëm. Ambasadat dhe konsullatat amerikane në të gjithë botën janë informuar se po zhvillohen udhëzime të reja. Kjo masë vlen edhe për studentët e shkëmbimeve, praktikantët dhe kujdestarët e fëmijëve, që mbajnë viza F, M ose J. Ashtu si me studentët kinezë, kjo përfshin një shqyrtim më të plotë të aplikuesve për vizë, veçanërisht në lidhje me përmbajtje kritike në mediat sociale.
Këto dy njoftime vijnë në mes të një konflikti në rritje midis qeverisë amerikane dhe Universiteti të prestigjioz të Harvardit, i cili ka një trupë të madhe studentësh ndërkombëtarë. Qeveria i justifikon masat e saj kundër Harvardit dhe universiteteve të tjera, pjesërisht, me faktin se ato nuk i kanë kundërshtuar mjaftueshëm protestat propalestineze, kritikat ndaj Izraelit dhe antisemitizmin./ DW
