Ekziston mundësia e një takimi me Presidentin e Shteteve të Bashkuara të Amerikës, Donald Trump, në Kinë, tha sot President...
BOTA
Macron për protestat masive në Francë: Nuk u shkaktuan nga ndërhyrje të jashtme!
PiranjatPërditësimi i fundit 21 Tetor 2026, 23:29
Presidenti francez, Emmanuel Macron, ka deklaruar se personat që planifikojnë të “shkaktojnë kaos” gjatë protestave kundër kostos së lartë të jetesës nuk do të lejohen ta bëjnë këtë.
Duke folur për mediat në Doha, ku u takua me sheikun Tamim bin Hamad Al Thani, Macron tha se do të zhvillonte një takim me shërbimet franceze të inteligjencës përpara protestave të planifikuara për të shtunën. Ai theksoi se nuk kishte pasur “ndërhyrje të dukshme të huaja në ngjarjet e ndodhura”, por paralajmëroi se më pas “ka pasur manipulim të informacionit nga jashtë”.
Më shumë se gjysmë milioni njerëz u mblodhën në të gjithë Francën të shtunën për të kërkuar kushte më të mira në shkolla dhe për të kundërshtuar koston e lartë të jetesës. Të paktën 2,500 persona u arrestuan pasi në disa zona shpërthyen trazira dhe u plaçkitën dyqane.
Macron këmbënguli se do të “merrte të gjitha masat e nevojshme” për të rivendosur atë që ai e cilësoi si “qetësi, siguri dhe rend”.
Presidenti francez kritikoi gjithashtu “komentet e papranueshme, madje edhe të pamenduara, të bëra nga shumë persona, përfshirë udhëheqës të huaj”. Sipas tij, disa liderë po ndërhynin në zhvillimet e protestave në Francë për të mobilizuar mbështetësit e tyre politikë.
Komentet e Macron duket se i referoheshin presidentit të Shteteve të Bashkuara, Donald Trump, i cili pretendoi se protestat kishin të bënin me imigracionin.
Kritikat e Macron duket se lidhen gjithashtu me deklaratat e kryeministrit izraelit, Benjamin Netanyahu, i cili tha se Franca ishte përfshirë nga një “pushtim i islamit ekstremist”. As Trump dhe as Netanyahu nuk paraqitën prova për të mbështetur pretendimet e tyre.
Të mërkurën, lëvizja franceze “Jelekët e Verdhë” njoftoi planet për një protestë të madhe në Paris gjatë këtij fundjave, pas një nate të dytë radhazi që kaloi pa incidente të mëdha, pavarësisht angazhimit të forcave të policisë në gatishmëri.
Macron tha se, për momentin, nuk ishte e nevojshme shpallja e gjendjes së jashtëzakonshme. Megjithatë, kryeministri Sébastien Lecornu është zotuar të forcojë sigurinë gjatë protestave të ardhshme.
Lecornu deklaroi se do të ketë një “dislokim masiv” të forcave të policisë, të mbështetura edhe nga ushtria. /PiranjatNews/
