Mbrojtëse fanatike e gjuhës së vendit të saj, qëllohet për vdekje në Lviv ish-deputetja ukrainase, shkaqet e vrasjes mister

iryna farion

UKRAINË- Një person i armatosur ka qëlluar dje për vdekje një ish-deputete nacionaliste të parlamentit të Ukrainës, e njohur për fushatat e zhurmshme për të mbrojtur gjuhën ukrainase, thanë autoritetet. Iryna Farion, 60 vjeç, u qëllua me armë zjarri në një rrugë në Lviv të Ukrainës, ndërsa autoritetet vijojnë ende me kërkimet me qëllim kapjen e autorit, shkruan Reuters.

Guvernatori rajonal i Lviv, Maksym Kozytskyi tha në Telegram se ish-deputetja kishte ndërruar jetë në spital. Ministri i Brendshëm Ihor Klymenko, tha se për momentin pistat ku po hetohet ngjarje lidhen me aktivitetin politik të Farionit ose me një motiv personal. Presidenti Volodymyr Zelenskyy tha se po merrte raporte të rregullta mbi përpjekjet për kapjen e të autorit të vrasjes, ndërsa u shpreh se çdo akt dhune duhet të dënohet.

Farion, një gjuhëtare, u bë anëtare e partisë nacionaliste Svoboda (Liria) në 2005 dhe u zgjodh deputete në parlament në 2012, por dështoi në përpjekjet e mëvonshme për të fituar një vend sërish. Ajo kishte shërbyer gjithashtu në këshillin rajonal të Lviv. 60-vjeçarja fitoi popullaritet nga fushatat e shpeshta për të promovuar gjuhën ukrainase dhe për të diskredituar zyrtarët publikë që flisnin rusisht.

Në muajt e parë pas pushtimit rus të Ukrainës në shkurt 2022, Farion denoncoi luftëtarët rusishtfolës të regjimentit Azov, të cilët mbrojtën qytetin port të Mariupolit për tre muaj. Megjithëse ukrainishtja është gjuha e vetme shtetërore e Ukrainës, shumë banorë flasin rusishten si gjuhë të parë, një trashëgimi e sundimit sovjetik, kur ukrainishtja ishte nën presionin zyrtar. Promovimi i gjuhës ka qenë prej kohësh një çështje e rëndësishme, me miratimin e legjislacionit nga parlamenti për të rrënjosur përdorimin e saj në jetën publike dhe në industrinë e shërbimeve.

iryna farion ukraine