Me bluza e pankarta me fotografitë e tij, varroset Faton Hajrizi, qindra qytetarë morën pjesë në ceremoninë mortore (FOTO)

Varrimi

KOSOVË- Faton Hajrizi është varrosur sot në fshatin e tij të lindjes në Klinë të Ulët në Skënderaj. Qindra qytetarë u mblodhën atje për funeralin e 39 vjeçarit. Në fshat, përreth rrugëve kryesore u vendosën flamuj kombëtarë dhe flamuj me logo të Ushtrisë Çlirimtare të Kosovës.

Shumë persona kanë udhëtuar përtej Drenicaës për të marrë pjesë në varrimin e Faton Hajrizit, i cili u vra nga autoritetet e Serbisë më 19 korrik, një ditë pasi ishte raportuar se ai e kishte vrarë një polic serb dhe e kishte plagosur një tjetër në qytetin e Lloznicës.

Disa prej pjesëmarrësve në varrim mbanin bluza e pankarta me fotografi të Faton Hajrizit, pavarësisht se kryeministri Albin Kurti kishte kërkuar që ai të mos madhërohet dhe që qytetarët të mos bien pre e euforisë së heroizimit të tij.

Faton Hajrizi ishte i dënuar të paktën tre herë nga dy gjykata për vrasje, tentim-vrasje, vjedhje e plaçkitje. Më së shumti njihet për vrasjen e një ushtari rus të misionit të NATO-s në Kosovë, KFOR, më 29 shkurt të vitit 2000, kur ai ishte 15-vjeçar.

Më 6 korrik ai ishte arratisur nga burgu i “tipit të hapur” në Smrekonicë të Vushtrrisë, ku po qëndronte muajt e fundit. Vendndodhja e tij nuk dihej për rreth dy javë, deri kur u raportua për vrasjen e një polici dhe plagosjen e një tjetri në Lloznicë të Serbisë.

Ai u vra nga policia serbe ai autor i asaj vrasjeje, ndërsa tri javë më pas, autoritetet atje lejuan tërheqjen e trupit të pajetë të Faton Hajrizit, pas një përpjekjeje jo të lehtë të avokatit të familjes. Nëna e tij të shtunën konfirmoi identitetin e të birit, ndërsa Instituti i Mjekësisë Ligjore e kreu autopsinë.

faton hajrizi varrim

Galeria fotografike (

)