Një profesor matematike në Universitetin e Patrës në Greqi ka vendosur një rregull të pazakontë për provimet e shtator...
BOTA
Mësuesja u vë fëmijëve të klasës së parë shirit ngjitës në gojë dhe i lidh pas karrigeve
PiranjatPërditësimi i fundit 24 Qershor 2026, 18:58
Ata ishin gjashtë vjeç dhe ndiqnin klasën e parë fillore kur – sipas akuzave – kishin pësuar keqtrajtime nga mësuesja e tyre, sot 63 vjeçe. Mësuesja dyshohet se u vinte shirit ngjitës në gojë, i lidhte pas dyerve dhe karrigeve, i kërcënonte se do t’i “largonte nga familjet e tyre” dhe u hidhte materialet mësimore nga dritarja si formë ndëshkimi.
Tani, siç shkruan gazeta Corriere della Sera, ajo është dënuar me 4 vjet burg nga Gjykata e Tarantos në Itali. Sipas gazetës, për 63-vjeçaren, e akuzuar për keqtrajtim të rënduar nga fakti se dhuna është ushtruar në prani të fëmijëve të tjerë, është vendosur edhe ndalimi i ushtrimit të funksioneve publike. Gjithashtu, ajo është dënuar, së bashku me Ministrinë e Arsimit të Italisë si përgjegjëse civile, të paguajë një shumë paraprake prej 5 mijë eurosh për secilën nga tetë palët civile.
Denoncimi dhe hetimet
Gjithçka nisi nga rrëfimi i nxënësve gjatë një aktiviteti diskutimi në kuadër të një projekti shkollor. Gjatë këtij takimi, ata treguan për herë të parë se çfarë kishte ndodhur kur ishin në klasën e parë.
Prindërit, pasi u njohën me këto rrëfime, paraqitën një kallëzim në polici. Më pas nisën hetimet, në një kohë kur fëmijët tashmë ndiqnin klasën e katërt fillore.
Sipas rrëfimit të nxënësve, mësuesja “në disa raste u mbyllte gojën me shirit ngjitës, u godiste duart me shuplaka” dhe “me të njëjtin shirit ngjitës nuk i lejonte të ngriheshin apo të lëviznin”.
Sipas hetuesve, kjo sjellje kishte për qëllim të impononte heshtjen dhe disiplinën në klasë, por shkaktoi shqetësime dhe trauma psikologjike te fëmijët e vegjël. /PiranjatNews/
