Ditën e mërkurë vendi ynë do të jetë nën ndikimin e masave ajrore të paqëndrueshme.
Moti parashikohet me vran&eu...
BOTA
Moti i keq me shira të rrëmbyeshëm përfshin Greqinë, pesë zona në alarm
PiranjatPërditësimi i fundit 2 Shkurt 2026, 11:05
Shira të dendur dhe stuhi të forta, në disa zona me intensitet të lartë, pritet të godasin Greqinë gjatë së hënës, kryesisht në ishujt e Egjeut Lindor dhe Qendror. Ndërkohë, në zonat malore dhe gjysmëmalore parashikohen edhe reshje të dendura dëbore.
Shërbimi Kombëtar Meteorologjik i Greqisë ka publikuar mbrëmjen e së dielës një buletin të rishikuar emergjence për fenomene të rrezikshme, i cili do të jetë në fuqi deri në orët e mesditës së së hënës.
Sipas autoriteteve, alarmi meteorologjik është ulur nga niveli i kuq në portokalli, megjithatë kushtet e motit mbeten problematike në disa rajone.
Reshje të dendura dëbore do të regjistrohen në zonat malore dhe gjysmëmalore të Maqedonisë Lindore dhe Trakisë, si dhe në disa zona të ulëta të Trakisë, deri në mesditën e së hënës.
Për shkak të kushteve të motit, autoritetet kanë vendosur mbylljen e shkollave në disa zona të Greqisë Veriore. Konkretisht, shkollat do të qëndrojnë të mbyllura në komunën Myki në Xanthi, në Nevrokopi, si dhe në disa zona të komunës Soufli, përfshirë Megalo Derio, Roussa, Sidirochori dhe Sidiro.
Fenomenet e motit të keq ishin intensive edhe gjatë ditës së dielë. Rasti më i rëndë u shënua në zonën Platykambos në Larisa, ku për shkak të stuhisë së fortë deti doli në tokë, duke përmbytur zona përreth dhe duke shkaktuar dëme materiale.
Ndërkohë, dhjetëra vizitorë u bllokuan për orë të tëra në Resortin e Skive Falakro, në rajonin e Dramës, për shkak të reshjeve të dendura të dëborës dhe erërave të forta, që arritën shpejtësinë deri në 30 kilometra në orë. Sipas autoriteteve lokale, operacioni për nxjerrjen e tyre përfundoi me sukses rreth orës 21:00 të së dielës.
Problemi u shkaktua kur disa automjete pa zinxhirë dëbore dhe goma dimërore ngecën në rrugën e zbritjes drejt Dramës, duke bllokuar qarkullimin dhe duke penguar largimin e rreth 40 automjeteve nga resorti.
Operacioni i pastrimit të rrugës u vështirësua nga erërat e forta, pasi bora mbulonte sërish rrugën vetëm pak minuta pas pastrimit. Autoritetet theksuan se gjatë gjithë kohës vizitorët ishin të sigurt, të strehuar në ambiente të ngrohta dhe me furnizim me pije të nxehta.
