Në kundërshtim me Donald Trump/ Franca, Gjermania, Italia dhe Anglia i japin 'Po'-në planit arab për rindërtimin e Gazës

PALESTINË- Një tjetër vendim që zgjeron hendekun midis Shteteve të Bashkuara dhe vendeve të mëdha evropiane u mor të shtunën, këtë herë në sfondin e çështjes palestineze. Franca, Gjermania, Italia dhe Britania njoftuan se pajtohen me planin arab për rindërtimin e Gazës, në kundërshtim me vizionin e presidentit amerikan Donald Trump për rivierën e Lindjes së Mesme.

“Plani tregon një rrugë realiste për rindërtimin e Gazës dhe premton, nëse zbatohet, një përmirësim të shpejtë dhe të qëndrueshëm të kushteve katastrofike të jetesës për palestinezët që jetojnë në Gaza”, thanë ministrat në një deklaratë të përbashkët.

Plani, i cili u hartua nga Egjipti dhe u miratua nga liderët arabë më herët, është hedhur poshtë nga presidenti i SHBA-së, Donald Trump.

Çfarë parashikon plani i Egjiptit?

Plani arab i propozuar nga Egjipti për rindërtimin e Gazës, i cili u prezantua në Konferencën e jashtëzakonshme Arabe të mbajtur më 4 mars, u nda në dy faza. Ky është një plan pesëvjeçar me banesa të reja, një port tregtar dhe një aeroport, kostoja e të cilit shkon në 53 miliardë dollarë.

Megjithatë, përpara se të fillojnë të vendosen themelet për infrastrukturën e re, plani egjiptian thotë se do të duhet të kryhen punimet fillestare të rindërtimit, të cilat do të zgjasin gjashtë muaj dhe do të përfshijnë heqjen e rrënojave dhe ndërtimin e banesave të përkohshme.

Faza e parë: Do të zgjasë dy vjet dhe është planifikuar ndërtimi i 200,000 shtëpive.
Faza e dytë: Do të zgjasë dy vjet e gjysmë dhe përfshin ndërtimin e 200,000 shtëpive të tjera dhe një aeroporti.

Faza e parë do të kushtojë rreth 20 miliardë dollarë, ndërsa faza e dytë do të kushtojë 30 miliardë dollarë sipas planit. Plani egjiptian është miratuar nga samiti arab, megjithatë presidenti amerikan është kthyer kundër.

lufta ne lindjen e mesme plani arab per rindertimin e gazes