Këshilli i Lartë i Prokurorisë (KLP), ka njoftuar pranimin e kërkesës e Inspektorit të Lartë të Drejtësisë (...
BOTA
Nga “6-7” në ligj/ Mitsotakis u shpjegon të miturve ndalimin e rrjeteve sociale në gjuhën e tyre (VIDEO)
PiranjatPërditësimi i fundit 8 Prill 2026, 17:54
Të gjithë fëmijët e lindur nga data 1 janar 2012 e në vijim, nuk do u lejohet që të përdorin rrjete sociale në Greqi. Vendimi është njoftur nga vetë kryeministri grek, Kyriakos Mitsotakis, i cili përmes një video në rrjete sociale, iu drejtua të miturve me trendin e famshëm “6-7”, duke u tërhequr kështu vëmendjen për t’u sqaruar atyre më shumë mbi këtë nismë.
Duke e marrë me mend se një lëvizje e tillë do të kundërshtohet nga të miturit, Mitsotakis u simpatizua me ndjesitë e tyre, teksa sqaroi se në fakt diçka e tillë po bëhet për të mirën e fëmijëve.
“Jam i sigurt se shumë vogëlushë do të mërziten me mua. Nëse do isha në moshën tuaj, ndoshta të njëjtën gjë do të ndjeja. Por roli ynë dhe i imi, nuk është të jemi gjithmonë të lumtur. Dua ta mendoni dhe ta diskutoni me shoqet dhe shokët tuaj”, tha ai.
Ndalimi do të bëhet në platformat Instagram, Facebook, TikTok dhe Snapchat. Nga projektligji përjashtohen platformat e mesazheve, siç mund të jenë WhatsApp apo Viber.
Ministri i Qeverisjes Digjitale dhe të Inteligjencës Artificiale, Dhimitris Papastergiou, cilësoi se verifikimi i moshës do të bëhet përmes Kids Wallet.
“Nuk do të funksionojë si Australia, e cila ia kalon përgjegjësinë platformave, por ne sugjerojmë që të përdorim mekanizma evropianë të verifikimit të moshës, siç është Kids Wallet. Ne jemi të parët që e përdorim dhe propozojmë që të bëhet i detyrueshëm. Këta mekanizma janë të besueshëm”, tha Papastergiou.
Ministri grek i Shëndetësisë, Adonis Georgiadis, u shpreh se nuk cenohet liria e fjalës, por po trajtohet një varësi e të rinjve.
“Liria e fjalës nuk preket, por ne po përshtatemi me zhvillimet teknologjike. Këtu po flasim për varësi. Tek të miturit, varësia mund të çojë në obezitet, lodhje vizuale, ndërsa në shëndetin mendor mund të çojë edhe në tendenca vetëvrasëse. Në të njëjtën kohë, ajo forcon edhe gjuhën e urrejtjes”, tha Georgiadis.
Përdorimi i internetit dhe mediave sociale nga të miturit po shoqërohet me rreziqe në rritje, duke nxitur varësi dhe sjellje problematike që në moshë të hershme. Një pjesë e konsiderueshme e adoleshentëve në shtetin fqinjë raportojnë shqetësime për privatësinë, përjetime të ngacmimit online dhe ankth kur nuk kanë qasje në telefon, ndërsa shumë prej tyre neglizhojnë aktivitete të rëndësishme për shkak të qëndrimit në rrjete sociale apo lojëra digjitale.
Gjithashtu ekziston një përhapje të gjerë të kontakteve online, përfshirje në sjellje me rrezik si cyberbullying, sexting dhe komunikimi me të huaj, si dhe dallime gjinore në mënyrën e përdorimit. Ky fenomen lidhet me pasoja në shëndetin fizik, si mungesa e aktivitetit dhe problemet me gjumin, por edhe në shëndetin mendor, duke përfshirë ankthin, depresionin, izolimin social dhe uljen e vetëvlerësimit. Në nivel social, vihet re rënie e ndërveprimit real dhe rritje e ekspozimit ndaj përmbajtjeve të papërshtatshme online.
