"Një ndarje mjaft e turpshme"/ Limaj i përgjigjet Haradinajt: Nuk kemi arritur asnjë marrëveshje me LVV-në, jam i gatshëm për të diskutuar me këdo!

KOSOVË- Kryetari i Partisë Nisma Socialdemokrate, Fatmir Limaj ka reaguar në lidhje me kritikat e kreut të AAK-së Ramush Haradinaj. Haradinaj në një deklaratë para mediave ka kritikuar ashpër qëndrimin e Partisë Nisma pas zgjedhjeve të 9 shkurtit teksa u shpreh se kjo parti duke mbështetur  pushtetin është ndarë në mënyrë të turpshme nga AAK-ja. Ai theksoi se nga mungesa e komunikimit me Fatmir Limaj e ka vështirësuar krijimin e shumcës nga opozita.

Limaj në reagimin e tij ka mohuar zërat që mund të ketë arritur një marrëveshje me Lëvizjen Vetëvendosje, duke thënë se deri më tani nuk kanë marrëveshje me askënd.

“Unë nuk kam asnjë shkresë nga askush dhe nuk kam parë ndonjë takim, ndonjë dakordim që dikush mos me u taku. Nëse ju keni parë ndonjë takim apo marrëveshje dhe unë kam munguar, atëherë keni të drejtë të thoni. Kushdo që ofrohet, ne jemi të gatshëm me u ul me bisedu”,  tha Limaj.

Mediat në Kosovë thonë se megjithatë mes NISMA dhe Vetëvendosje janë duke u zhvilluar negociata intensive përpara se të mblidhet seanca e parë e Kuvendit të ri të martën. Gazetari i T7, Leonard Kërquki tha në emdisionin e tij “Pressing” se NISMA ka kërkuar postin e kreut të Kuvendit dhe një paketë ligjesh për miratim në Kuvend, përfshirë edhe atë për pragun elektoral. Gjithsesi, sipas tij deri tani nuk ka ndonjë përgjigje nga Albin Kurti.