Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Orban propozon rezolutë për atentatin ndaj Trump/ Parlamenti Evropian e kundërshton: Nuk do tu japim platformë armiqve të demokracisë
E.DPërditësimi i fundit 17 Korrik 2024, 17:34
SHBA- Parlamenti Evropian ka hedhur poshtë një propozim të së djathtës ekstreme për të diskutuar për tentativën për vrasjen e Donald Trump dhe dhunën në rritje politike në legjislaturën e BE-së. Grupi Patriotët për Evropën e Orbanit kërkuan një debat mbi atentatin ndaj Trump dhe bëri thirrje për një rezolutë që dënon dhunën.
Propozimi u refuzua me 337 vota kundër, 119 pro dhe 15 abstenime. Një grup tjetër i ekstremit të djathtë, Evropa e Kombeve Sovrane, votoi pro, si dhe grupi i konservatorëve dhe reformistëve evropianë të ekstremit të djathtë, i cili përfshin eurodeputetët e kryeministres italiane Giorgia Meloni.
“Patriotët për Evropën sot propozuan një debat në Parlamentin Evropian për tentativën për vrasjen e ish-presidentit amerikan Donald Trump dhe rritjen e dhunës politike në Evropë, por grupet tradicionale e refuzuan atë”, shkruante grupi Patriots në një postim në rrjetet sociale.
Patriotët për Evropën u formua muajin e kaluar dhe është grupi i tretë më i madh në Parlamentin Evropian. Ai përbëhet nga eurodeputetë nga partitë e Viktor Orban dhe Marine Le Pen. Partia Popullore Evropiane e qendrës së djathtë, Socialistët dhe Demokratët, Rinovimi liberal i Evropës, të Gjelbërit dhe e Majtë votuan kundër diskutimit të atentatit.
“Ne nuk do t’u japim një platformë armiqve të demokracisë, ne besojmë se një kordon sanitar është i nevojshëm për të gjitha grupet e krahut të djathtë ekstrem në parlament për t’i penguar ata që pikëpamjet antidemokratike të bëhen të zakonshme,” tha bashkëkryetari i grupit të majtë Martin Širdevan.
Ndërkohë nj zëdhënës i PPE tha se kishin një marrëveshje midis grupeve politike që të mos shtonim asnjë debat në këtë seancë plenare, përveç mbështetjes për Ukrainën.
“Shumica e majtë-liberale në Parlamentin Evropian nuk dëshiron të dënojë përpjekjen për të vrarë Donald Trump,” shkroi në rrjetet sociale pas votimit nënkryetarja e parë e grupit Kinga Gal, një anëtare e Parlamentit Evropian nga partia Fidesz e Orbanit. Deputeti belg i ekstremit të djathtë dhe anëtari i Patriotit Tom Vandendrische shprehu gjithashtu zemërim për propozimin e refuzuar, duke e quajtur atë hipokrizi.
“Zemërimi për sulmin ndaj demokracisë duket se është mjaft selektiv në Parlamentin Europian”, tha ai.
