Zjarri në zonën e Radostinës në Fier vijon të jetë aktiv me intensitet të lartë dhe situata raportohet e vështir&...
BOTA
Partitë arrijnë marrëveshje në parim për borxhin, Merz: Gjermania është rikthyer
M.B.Përditësimi i fundit 14 Mars 2025, 22:49
GJERMANIA- Partitë konservatore CDU/CSU të fituesit të zgjedhjeve parlamentare në Gjermani Friedrich Merz dhe Socialdemokratët (SPD) kanë arritur një marrëveshje në parim me të Gjelbrit mbi planet për një rritje masive të borxhit shtetëror përpara votimit parlamentar të javës së ardhshme.
Plani i reformës së borxhit, i paraqitur së bashku nga konservatorët dhe SPD, do të përjashtonte shpenzimet e mbrojtjes nga frena e borxhit të parashikuar me kushtetutë të vendit dhe do të krijonte një fond të posaçëm prej 500 miliardë eurosh për investimet në infrastrukturë.
Lajmi u raportua nga agjencia e lajmeve Reuters, duke cituar një burim të afërt me negociatat. Një nga burimet tha se angazhimi përfshin dhënien e 100 miliardë eurove për Fondin e Klimës dhe Transformimit Ekonomik.
Çfarë thanë politikanët gjermanë?
"Gjermania është rikthyer," tha Merzi kur njoftoi marrëveshjen e reformës së borxhit.
"Ajo dërgon një mesazh të qartë për partnerët dhe miqtë tanë, por edhe për kundërshtarët tanë, për armiqtë e lirisë sonë: ne jemi të aftë të mbrohemi dhe tani jemi plotësisht të përgatitur për ta bërë këtë”, tha ai.
Merzi tha gjithashtu se ai pret që vendi të dërgojë 3 miliardë euro ndihmë ushtarake shtesë për Ukrainën, pasi Bundesrati, dhoma e landeve federale, të miratojë reformën e borxhit.
"Nuk do të ketë mungesë të burimeve financiare për të mbrojtur lirinë dhe paqen në kontinentin tonë," theksoi Merz. "Gjermania po jep kontributin e saj të madh në mbrojtjen e lirisë dhe paqes në Evropë."
Nga ana e tij, bashkëdrejtuesi i socialdemokratëve, Lars Klingbeil tha se rritja masive e borxhit dhe investimeve të qeverisë përfaqëson një "nxitje të fuqishme" për ekonominë më të madhe të Evropës.
"Ne kemi hedhur themelet që Gjermania të rimëkëmbet dhe të mbrohet", tha Klingbeili pasi partia e tij SPD ra dakord për paketën historike të borxhit me Konservatorët dhe të Gjelbrit.
Merz dëshiron që Bundestagu në largim të miratojë reformën e borxhit
Të Gjelbrit fillimisht kishin refuzuar të mbështesin planin, i cili kishte nevojë për mbështetjen e tyre për të arritur shumicën e dy të tretave të nevojshme për një ndryshim kushtetues në Bundestag.
Qëllimi i Merzit është të sigurojë fondet përpara mbledhjes së Bundestagut të ri më 25 mars, ku ato rrezikojnë të bllokohen nga një kontigjent i zgjeruar ligjvënësish të ekstremit të djathtë dhe të majtë.
Bundestagu në largim mund të miratojë paketën ligjora të martën. Më pas ajo duhet të miratohej me dy të tretat e shumicës në dhomën e sipërme, Bundesrat./ DW
