"Po i japim miliarda dollarë"/ Trump këmbëngul në bllokimin e studentëve të huaj nga Harvard: Disa vijnë nga vende që nuk janë aspak miqësore me SHBA-në

SHBA- Presidenti i SHBA-së, Donald Trump, mbrojti sot vendimin e administratës së tij për të bllokuar regjistrimin e studentëve të huaj në Harvard, një masë që u quajt e paligjshme nga universiteti i njohur dhe u pezullua nga një gjyqtar.

“Pse Harvard nuk thotë se gati 31% e studentëve të tij vijnë nga VENDE TË HUAJA, e megjithatë këto vende, disa prej të cilave nuk janë aspak miqësore me Shtetet e Bashkuara, NUK PAGUANIN ASGJË për arsimimin e studentëve të tyre dhe as nuk kanë ndërmend ta bëjnë këtë”, shkroi Trump në platformën Truth Social, të cilën ai e zotëron.

"Ne duam të dimë se kush janë këta studentë të huaj, një kërkesë e arsyeshme pasi ne i japim Harvardit MILIARDË DOLLARË, por Harvardi nuk është vërtet transparent", shtoi ai, duke i bërë thirrje universitetit të "ndalojë së kërkuari" para nga qeveria federale.

Të enjten, Sekretarja e Sigurisë Kombëtare Christie Noem njoftoi revokimin e të drejtës së Harvardit për të pranuar studentë të huaj. Por një gjyqtar shpejt e pezulloi masën, të cilën universiteti e apeloi të premten herët në mëngjes në gjykatën federale në Massachusetts.

Administrata Trump akuzon Harvardin se nuk i lejon Uashingtonit të mbikëqyrë proceset e pranimit të studentëve dhe punësimit të fakultetit, dhe e akuzon universitetin se është një bastion i antisemitizmit, se promovon ide tepër progresive të krahut të majtë dhe se ka lidhje me Partinë Komuniste Kineze. Qeveria amerikane kishte prerë tashmë më shumë se dy miliardë dollarë subvencione për universitetin, gjë që çoi në ndalimin e disa programeve kërkimore.

Sipas faqes së tij të internetit, Harvardi, i cili renditet ndër universitetet më të mira në botë dhe ka nxjerrë 162 laureatë të Çmimit Nobel, po mirëpret afërsisht 6,700 "studentë ndërkombëtarë" këtë vit, 27% të numrit të përgjithshëm të studentëve. Këta janë studentë të cilëve ai u kërkon dhjetëra mijëra dollarë në vit për tarifa shkollimi. Harvard është universiteti më i pasur në Shtetet e Bashkuara, me një fond të vlerësuar në 53.2 miliardë dollarë në vitin 2024.