Tenderi 50 milionë euro për mirëmbajtjen e akseve rrugore kombëtare është është shndërruar në një skandal...
BOTA
Pronari i Snapchat shkurton 1 mijë vende pune, shkak bëhet inteligjenca artificiale
PiranjatPërditësimi i fundit 16 Prill 2026, 11:15
Snapchat është kompania më e fundit e teknologjisë që shkurton vende pune, duke përmendur rritjen e aftësive të mjeteve të inteligjencës artificiale (AI).
Pronari i Snapchat ka larguar rreth 1,000 punonjës – 16% e stafit – dhe ka anuluar qindra pozicione të hapura pune, sipas një deklarimi financiar.
Evan Spiegel, bashkëthemelues dhe CEO i Snap, u tha punonjësve se kompania ndodhet në “një moment vendimtar” dhe se qëllimi i shkurtimeve është të reduktojë kostot vjetore me 500 milionë dollarë (368 milionë paund).
Spiegel tha se punonjësit që do të mbeten në kompani do të përdorin mjete të AI për të “ulur punën e përsëritur dhe për të rritur shpejtësinë e punës”, ashtu siç kanë bërë “skuadra të vogla” muajt e fundit.
“Ndryshime të kësaj përmase dhe me këtë ritëm nuk janë kurrë të lehta dhe nuk do të jenë pa probleme,” shtoi ai në mesazhin e tij.
Ky është të paktën shkurtimi i tretë i madh i stafit në Snap që nga viti 2022, kur kompania realizoi largimin e parë të madh që preku 20% të punonjësve.
Komentet e Spiegel janë hera e parë që ai përmend AI si arsye për vendimet mbi stafin.
Këtë vit, investitori aktivist Irenic Capital Management bleu aksione në Snap dhe në një letër publike drejtuar Spiegel tha se është “e çuditshme” që kompania mbetet jo fitimprurëse pas 15 vitesh aktiviteti dhe me qindra miliona përdorues mujorë. Sipas tyre, një investitor që do të kishte investuar 1 dollar në Snap në vitin 2017, sot do të kishte vetëm 23 cent.
Një investitor aktivist është një person ose firmë investimi që blen aksione në një kompani që e konsideron me performancë të dobët dhe më pas ushtron presion për ndryshime në menaxhim dhe biznes.
Snap tani ka nevojë për “një mënyrë të re pune që është më e shpejtë dhe më efikase, duke u orientuar drejt rritjes fitimprurëse”, shkroi Spiegel.
Shpjegimi i tij përputhet me atë të drejtuesve të tjerë të teknologjisë këtë vit, të cilët kanë filluar të përmendin aftësitë në rritje të AI – veçanërisht mjetet që ndihmojnë programuesit – si arsye për shkurtimet masive.
Që në fillim të këtij viti, kompani si Amazon, Meta, Block, Pinterest dhe Atlassian kanë larguar kolektivisht mijëra punonjës.
Drejtuesit e kompanive kanë theksuar ose se përdorimi më i madh i AI do të thotë se duhen më pak punonjës, ose se planet për të investuar qindra miliarda dollarë në AI kërkojnë ulje kostosh në sektorë të tjerë.
Jack Dorsey, CEO i Block dhe ish-drejtues i Twitter, tha në fund të shkurtit se rritja e mjeteve të AI për punonjësit e teknologjisë “po ndryshon në mënyrë thelbësore çfarë do të thotë të ndërtosh dhe drejtosh një kompani”.
Ai gjithashtu paralajmëroi se duhet të priten shkurtime të tjera vendesh pune në “shumicën e kompanive” gjatë vitit të ardhshëm./Përktheu Piranjat News
