Një tjetër denoncim për situatën e mbetjeve urbane ka mbërritur në redaksinë e Piranjave News, këtë herë nga...
BOTA
Rritet kërcënimi i sëmundjeve kronike të mëlçisë në Europë, ja shkaqet
PiranjatPërditësimi i fundit 26 Maj 2026, 11:29
Europa po përballet me një rritje shqetësuese të sëmundjeve kronike të mëlçisë, sipas një serie studimesh të publikuara në revistën shkencore The Lancet Regional Health – Europe.
Studimi u realizua nga më shumë se 75 ekspertë nga 30 vende, nën koordinimin e Institutit të Shëndetit Global në Barcelonë.
Sipas studiuesve, sëmundjet kronike të mëlçisë po shkaktojnë një numër të lartë vdekjesh të parakohshme dhe po prekin më shumë burrat dhe grupet sociale vulnerabël.
Ekspertët paralajmërojnë se sëmundja metabolike e mëlçisë po ndryshon ndjeshëm situatën shëndetësore në Europë. Vlerësohet se një në tre qytetarë në BE dhe Mbretërinë e Bashkuar vuan nga dhjamosja e mëlçisë e lidhur me çrregullimet metabolike, e njohur si MASLD.
Kjo sëmundje konsiderohet tashmë një nga shkaqet kryesore të kancerit të mëlçisë në Europë.
Një nga faktorët kryesorë mbetet konsumimi i lartë i alkoolit. Europa ka nivelin më të lartë të konsumit të alkoolit për frymë në botë, si edhe normat më të ulëta të abstinencës.
Sipas raportit, alkooli lidhet me rreth 40% të afro 287 mijë vdekjeve të parakohshme të lidhura me sëmundjet e mëlçisë çdo vit në Europë.
Ekspertët theksojnë se obeziteti, diabeti, ushqimet ultra të përpunuara dhe mungesa e aktivitetit fizik po ndikojnë gjithashtu në rritjen e rasteve.
Ata kërkojnë politika më të forta për shëndetin publik dhe kontrolle më të hershme për diagnostikimin e sëmundjeve të mëlçisë.
Sipas studiuesve, miliona persona mbeten të padiagnostikuar, ndërsa diagnostikimi i hershëm mund të ndihmojë në parandalimin e fibrozës, cirrozës dhe kancerit të mëlçisë.
Raporti rekomandon forcimin e kontrolleve mjekësore, përmirësimin e aksesit në trajtim dhe masa më të rrepta ndaj konsumit të alkoolit në vendet europiane.
