Katërmbëdhjetë satelitë rusë të zbulimit thuhet se kaluan mbi një bazë ushtarake amerikane në Arabinë Saudit...
BOTA
Rusia në pritje pas fitores së Péter Magyar, reagon Kremlini! Kryeministri i ri i Hungarisë: Do të flasim, por nuk do të bëhemi miq!
PiranjatPërditësimi i fundit 13 Prill 2026, 14:13
Rusia duket se po ndjek me kujdes zhvillimet politike në Hungari pas fitores së opozitës dhe humbjes së kryeministrit Viktor Orbán, një nga aleatët më të afërt të Kremlinit në Evropë.
Zëdhënësi i Kremlinit, Dmitry Peskov, në reagimin e parë për zgjedhjet e së dielës, theksoi se Moska pret të ruajë marrëdhënie “realiste” me udhëheqjen e re hungareze.
“Presim që të vazhdojmë të kemi marrëdhënie realiste me qeverinë e re të Hungarisë”, deklaroi ai, duke iu përgjigjur pyetjeve nëse Budapesti do të ndryshojë qëndrim për kredinë prej 90 miliardë eurosh të Bashkimit Evropian për Ukrainën, e cila ishte bllokuar nga Orbán.
Peskov nënvizoi se është ende herët për të nxjerrë përfundime mbi politikat që do të ndjekë qeveria e re.
“Duhet të tregojmë durim dhe të shohim se si do të zhvillohen gjërat. Ne jemi të interesuar për marrëdhënie të mira me Hungarinë dhe me vendet e tjera evropiane”, u shpreh ai.
Sa i përket çështjeve energjetike, Kremlini ia la në dorë vendimmarrjen qeverisë së re hungareze dhe vendeve të tjera evropiane për të ardhmen e naftësjellësit “Druzhba”, pjesë e të cilit është pezulluar nga Ukraina.
Nga ana tjetër, Peskov hodhi poshtë çdo lidhje mes rezultatit zgjedhor në Hungari dhe luftës në Ukrainë, duke theksuar se “janë dy procese të ndara”.
Në një intervistë për mediat vendase, kryeministri i ri Péter Magyar u shpreh se Hungaria do të vazhdojë dialogun me Rusinë për çështje pragmatike, sidomos në fushën e energjisë.
“Duhet të ulemi në tryezën e negociatave me presidentin rus. Gjeografia nuk ndryshon, as varësia energjetike”, tha ai.
Megjithatë, Magyar bëri të qartë se kjo nuk do të thotë afrimi politik me Moskën: “Nëse duhet, do të negociojmë, por nuk do të bëhemi miq”.
Sipas rezultateve paraprake, opozita e bashkuar pritet të sigurojë një shumicë të fortë, madje deri në dy të tretat e parlamentit, duke hapur rrugën për ndryshime të thella në vend pas 16 vitesh qeverisjeje nga Orbán.
Pjesëmarrja e lartë në zgjedhje dhe mobilizimi i votuesve të zhgënjyer konsiderohen faktorë kyç në këtë rezultat.
Megjithatë, sfida kryesore për qeverinë e re mbetet ruajtja e unitetit të një koalicioni të gjerë dhe përballja me strukturat e ngritura ndër vite nga qeveria e mëparshme.
“E morëm mbrapsht atdheun tonë”, deklaroi Magyar, duke bërë thirrje për qetësi dhe maturi përballë provokimeve të mundshme.
Humbja e Orbán shihet si një goditje edhe për Vladimir Putin, duke qenë se Hungaria konsiderohej si një nga aleatët më të rëndësishëm të Moskës brenda Bashkimit Evropian.
