Ish-ministri i Jashtëm, Ditmir Bushati ka reaguar për herë të parë në lidhje me protestat masive të të rinjve dhe qyteta...
BOTA
Serbët vazhdojnë protestat pavarsisht se Vuçiç "premtoi" se do të japë dorëheqjen
Piranjat NewsPërditësimi i fundit 29 Qershor 2026, 07:38
Mijëra protestues u mblodhën në qytetin serb të Kralevës të dielën, duke vazhduar presionin mbi Presidentin Aleksandar Vuçiç një ditë pasi ai tha se do të jepte dorëheqjen brenda disa javësh për të hapur rrugën për zgjedhje të parakohshme presidenciale dhe parlamentare.
Edhe pse shumë protestues shprehën kënaqësi për dorëheqjen e Vuçiçit, ata kanë frikë se ai mund të mos heqë dorë plotësisht nga pushteti. Analistët thonë se ai mund të përpiqet të kandidojë për kryeministër dhe të instalojë një aleat në presidencë në mënyrë që të mund të vazhdojë të ushtrojë pushtetin.
«Nuk mund ta imagjinoj që ai të japë dorëheqjen dhe t’ia lërë pushtetin dikujt tjetër», tha Marko Djokic, një ekspert 41-vjeçar i IT-së, i cili u kthye në qytetin e tij të lindjes për protestat.
Vuçiç, i cili ka qenë në pushtet si kryeministër ose president për 12 vjet, është përballur me muaj të tërë protestash të udhëhequra nga studentët, të shkaktuara nga shembja e një tendë betoni në një stacion hekurudhor në qytetin verior të Novi Sadit në fund të vitit 2024, ku humbën jetën 16 persona.
Incidenti u bë simbol i asaj që shumë serbë e shohin si keqmenaxhim qeveritar dhe korrupsion nën drejtimin e Vuçiçit. Protestat që pasuan kanë qenë më të mëdhatë në Serbi që nga përmbysja e Slobodan Millosheviçit në vitin 2000. Vuçiç mohon çdo akuzë për korrupsion.
Të dielën, njerëzit përballuan valën e të nxehtit për t'u mbledhur për një protestë në sheshin qendror në Kraljevo, ku në pankarta shkruhej "Studentët po fitojnë". Mijëra protestues valëvitnin flamuj serbë ndërsa tuboheshin në mënyrë paqësore.
"Nuk mund të vazhdojmë kështu, gjërat duhet të ndryshojnë", tha Ilija Cordasic, i cili u bashkua nga qyteti verilindor i Zrenjaninit.
Jelena Danicic, një profesoreshë e gjuhës serbe, tha para tubimit: “Kjo nuk është vetëm një luftë politike, por një luftë midis së mirës dhe së keqes.”
Analistët presin që Brukseli dhe Moska të ndjekin nga afër zhvillimin e ngjarjeve në javët e ardhshme.
BE-ja ka dënuar përdorimin e forcës kundër protestuesve paqësorë në Serbi dhe ka ngritur shqetësime në lidhje me lirinë e shtypit dhe pavarësinë e gjyqësorit.
Serbia, e cila ndodhet në pragun lindor të BE-së, është një kandidate për t'u bashkuar me bllokun, por Beogradi ende ka lidhje të forta me Rusinë dhe Kinën. Vuçiç ka ndjekur një vijë të hollë diplomatike ndërsa përpiqet të balancojë këto marrëdhënie.
Përpara se Serbia të mund të anëtarësohet në BE, ajo duhet të përmirësojë sundimin e ligjit, duke përfshirë kushtet për zgjedhje të lira dhe të ndershme, dhe të çrrënjosë korrupsionin dhe krimin e organizuar. Ajo gjithashtu duhet të përafrojë politikat e saj të jashtme me ato të bllokut dhe të krijojë marrëdhënie me ish-provincën e saj, Kosovën, e cila shpalli pavarësinë në vitin 2008./REUTERS-Piranjat News
