Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
BOTA
SHBA i jep Izraelit 30 ditë afat që të rrisë ndihmat humanitare në Gazë
n.fPërditësimi i fundit 16 Tetor 2024, 16:10
Foto ilustruese
SHBA- Shtetet e Bashkuara i kanë dërguar një letër Izraelit ku i kërkohet të mundësojë një rritje të menjëhershme të sasisë së ndihmave humanitare që futen në Gazë. Siç njofton korrespondentja e Zërit të Amerikës, Carla Babb, letra për të cilën Pentagoni tha se kishte për qëllim të mbetej private, vjen pas fillimit të mbërritjes në Izrael të pjesëve të një sistemi amerikan të mbrojtjes ajrore që synon ta mbrojë atë vend kundër sulmeve të ardhshme me raketa balistike.
Ndërsa përkeqësohet situata humanitare në Gazë, Sekretari i Shtetit Antony Blinken dhe Sekretari i Mbrojtjes Lloyd Austin u dërguan një letër homologëve izraelitë, duke u bërë thirrje për angazhime konkrete në përmirësimin e situatës humanitare brenda 30 ditëve. Në të kundërt, thuhet në letër, kjo mund të ndikojë tek politika amerikane.
“Sekretari Blinken dhe sekretari Austin menduan se qeverisë izraelite duhej t’i bëhej e qartë nevoja për shtimin e ndihmave në Gazë nga nivelet e ulëta që kemi sot”, tha zëdhënësi i Departamentit të Shtetit, Matthew Miller.
Sipas Uashingtonit, një kërkesë e ngjashme që iu dërgua Izraelit në prill çoi në shtimin e ndihmave humanitare në Gazë. Por aktualisht, sasia e ndihmave është ulur me më shumë se 50%.
“Rrugët tokësore janë mënyra më efektive për të dërguar ndihma për civilët që kanë më shumë nevojë. Sigurisht që duam t'i shohim këto korridore të hapura. Sekretari Austin vazhdon ta theksojë këtë kërkesë”, tha zëdhënësja e Pentagonit, Sabrina Singh.
Uashingtoni nuk pranoi të thoshte këtë javë se çfarë do të ndodhte nëse Izraeli nuk i përmbush kërkesat që parashtrojnë letrat. Zëri i Amerikës e pyeti zëdhënësen e Pentagonit nëse ushtria amerikane po diskuton mbi ndalimin e mbështetjes ushtarake për Izraelin.
“Izraeli vazhdon të ketë mbështetje nga Shtetet e Bashkuara, qoftë përmes shitjeve të armëve apo kontributit amerikan për vetëmbrojtjen e Izraelit. Nuk mund të them më shumë”, u përgjigj zëdhënësja e Pentagonit, Sabrina Singh.
Pjesë të sistemit amerikan të mbrojtjes ajrore, THAAD, dhe dhjetëra trupa amerikane për ta drejtuar atë, kanë filluar të mbërrijnë në Izrael.
“Ju keni parë angazhimin e anijeve tona luftarake nga deti. Tani po ofrojmë mbrojtje nga toka kundër një sulmi tjetër të mundshëm me raketa balistike nga Irani, nëse ai vend zgjedh të reagojë”, tha zëdhënësja Singh.
Irani ka ndërmarrë dy sulme të drejtpërdrejta kundër Izraelit, i fundit më 1 tetor me rreth 180 raketa balistike. Tel Avivi ende nuk ka reaguar ushtarakisht ndaj sulmit të fundit të Teheranit./VOA
