Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Shënohen mbi 55 viktima në Rripin e Gazës/ Izraeli 'kërcënon' për një sulm me pasoja shumë herë më të rënda nëse nuk lirohen pengjet nga territori palestinez
m.lPërditësimi i fundit 24 Prill 2025, 21:55
GAZA- Izraeli do të nisë një sulm shumë më të madh në Rripin e Gazës, nëse pengjet nuk lirohen nga territori palestinez, ku të paktën 55 persona, përfshirë fëmijë, janë vrarë që nga mëngjesi nga bombardimet izraelite, sipas burimeve palestineze.
Duke thyer një armëpushim prej rreth dy muajsh në luftën që shpërtheu më shumë se një vit e gjysmë më parë, Izraeli rifilloi më 18 mars sulmin ajror, dhe më pas sulmin tokësor, kundër lëvizjes islamike palestineze Hamas në Rripin e Gazës.
"Nëse nuk shohim përparim në kthimin e pengjeve në të ardhmen e afërt, ne do t'i zgjerojmë aktivitetet tona në një operacion shumë më të madh", tha shefi i shtabit të forcave të armatosura izraelite, gjeneralmajor Eyal Zamir, duke vizituar trupat izraelite të vendosura në enklavën e rrethuar.
Lufta shpërtheu më 7 tetor 2023, pas sulmit të paprecedentë të Hamasit ndaj Izraelit, gjatë të cilit më shumë se 250 njerëz u rrëmbyen dhe u dërguan në Gaza. Më herët gjatë ditës së sotme, ushtria u bëri thirrje banorëve të zonave Beit Hanoun dhe Sheikh Zayed, në Rripin verior të Gazës, që të evakuojnë këto lagje përpara një sulmi të fortë, duke synuar një zonë që ajo akuzon se ka operacione snajperësh dhe aktivitete terroriste.
Mbrojtja civile dhe burimet spitalore palestineze raportojnë 55 vdekje që nga mëngjesi i sotëm. Spitali indonezian në Jambalah njoftoi se kishte marrë trupat e nëntë viktimave pas një sulmi në një stacion policie në këtë qytet në pjesën veriore të enklavës. Ushtria izraelite konfirmoi se kishte goditur zonën, duke specifikuar se kishte shënjestruar terroristët që vepronin brenda një qendre komandimi dhe kontrolli të Hamasit dhe Xhihadit Islamik, një organizatë aleate e Hamasit.
Situata humanitare ka qenë veçanërisht e rëndë në Gaza që kur Izraeli mbylli vendkalimet për ndihmë humanitare më 2 mars, duke e akuzuar Hamasin për keqpërdorim të saj. Në tregjet e improvizuara, banorët e Gazës nuk mund të gjejnë më shumë ushqim, rezervat e miellit po mbarojnë, ndërsa organizatave humanitare që veprojnë në enklavë po mbarojnë gjithçka.
