Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Takimi Mitsotakis-Erdogan/ Çfarë u bisedua mes liderëve dhe çfarë e karakterizoi darkën në "Pallatin e Bardhë" në Ankara?
r.lllPërditësimi i fundit 14 Maj 2024, 09:18
kyriakos mitsotakis dhe rexhep tajip erdogan
TURQI- Pasditen e djeshme në Ankara ka pasur shumë buzëqeshje mes zyrtarëve grekë dhe turq. Nuk është se vështirësitë dhe pengesat e kësaj marrëdhënieje komplekse dypalëshe janë zhdukur papritur dhe me magji, por duket se të dy vendet kanë zgjedhur me vetëdije prej më shumë se një viti rrugën e depërshkallëzimit dhe bashkëpunimit aty ku është e mundur.
Atmosfera e mirë vazhdoi edhe në darkë, e cila përmbylli takimin e katërt radhazi mes kryeministrit grek Kyriakos Mitsotakis dhe presidentit turk Rexhep Tajip Erdogan në më pak se një vit.
Ndryshe nga dreka e punës në Athinë, ku delegacionet u ulën në tryezën e vetme të Pallatit Maximus, në Ankara presidenca turke i vendosi të ftuarit në një tryezë ovale. Siç dëshmojnë dëshmitarët okularë bazuar në gjuhën e trupit, atmosfera ishte jashtëzakonisht e mirë. Kjo mund të jetë ndihmuar nga brinjët e qengjit, qebapët dhe dolmat e servirura nga turqit, ndërsa një orkestër me instrumente tradicionale luante këngë orkestrale turke dhe greke, duke përfshirë "Fragosyriani", shkruan "Protothema".
Tension i kontrolluar për Gazën
Atmosfera e mirë në vakt ishte kulmi i një vizite po aq të mirë që i kishte paraprirë. Mitsotakis qëndroi në zyrën e presidentit turk për 1.5 orë, rreth gjysmë ore më shumë se sa ishte planifikuar zyrtarisht. Po aq të mira ishin edhe bisedimet e zhvilluara me delegacionet e zgjeruara, megjithëse, ato zgjatën më pak.
Interesante në konferencën për shtyp ishte se Erdogan nuk iu referua një çështjeje që ka të bëjë me sovranitetin grek, siç janë parqet detar ose shndërrimit të Manastirit të Chorës në xhami.
Me gjithë këto çështje dypalëshe të hapura, Erdogan zgjodhi t'i përgjigjet deklaratave të Mitsotakis në mënyrë të “kontrolluar”, pra duke ngritur çështjen e Gazës dhe karakterizimin e Hamasit si organizatë terroriste. Një çështje që e shqetëson veçanërisht për brendësinë e tij, ndërsa në Greqi nuk ka ndonjë rëndësi të veçantë. Erdogan nuk ishte përgjigjur në Athinë, kur Mitsotakis kishte marrë fjalën pas referimit të tij për një "pakicë turke" në Traki. Në çdo rast, mesazhi i dërguar nga takimi është se pavarësisht tensioneve dhe mosmarrëveshjeve që ekzistojnë, rendi i dialogut greko-turk nuk duhet të prishet. Me fjalë të tjera, ne mund të diskutojmë, edhe nëse nuk jemi dakord.
Produkt praktik i takimit ishte urdhri i Mitsotakis dhe Erdogan për ministrat e Jashtëm Gerapetritis dhe Fidan për të përcaktuar kontekstin e takimeve të radhës. Të dy liderët do të jenë në të njëjtin vend në Uashington, në Samitin e NATO-s në korrik, ndërsa takimi i radhës do të zhvillohet në Nju Jork, në margjinat e Asamblesë së Përgjithshme të OKB-së në shtator.
Sipas informacioneve, Giorgos Gerapetritis dhe Hakan Fidan do të bisedojnë në verë, në margjinat e Samitit të NATO-s. Për sa i përket agjendës pozitive dhe dialogut politik, megjithatë, emërimi nga Turqia i zëvendësministrit të ri të Punëve të Jashtme që do të trajtojë skemën me Alexandra Papadopoulou dhe Kostas Fragogiannis është në pritje, pasi zëvendësministri aktual Burak Aksapar do të largohet në verë për OKB-ja.
