Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
Trump: Jam i hapur për transferimin e të burgosurve amerikanë në burgjet "Fortesa" të El Salvadorit
n.fPërditësimi i fundit 7 Prill 2025, 10:36
SHBA- Presidenti amerikan, Donald Trump përsëriti dje se nuk do të përjashtonte mundësinë e transferimit të shtetasve të burgosur amerikanë në El Salvador, kur u pyet për këtë nga gazetarët në avionin presidencial. Presidenti i El Salvadorit, Naguib Bukele propozoi në fillim të këtij viti që vendi i tij të pranonte kriminelë të dhunshëm nga SHBA dhe t'i burgoste në CECOT, një qendër masive paraburgimi për të dyshuarit si pjesë e bandave.
"Nëse ata mund t'i mbajnë këta kriminelë të tmerrshëm për shumë më pak para se sa na kushtojnë neve, unë jam për të, por do të bëj vetëm atë që është brenda ligjit," u tha Presidenti Trump gazetarëve në bordin e avionit presidencial.
Republikani ka ftuar homologun e tij salvadoran të vizitojë Shtëpinë e Bardhë më 14 prill dhe çështja ka të ngjarë të jetë në axhendë. Autoritetet amerikane kanë transferuar tashmë më shumë se 200 të huaj - sipas administratës Trump, kryesisht anëtarë të një bande famëkeqe ndërkombëtare të krijuar fillimisht në Venezuelë - në El Salvador, duke sfiduar urdhrat e gjykatës për të mos vazhduar me projektin.
Kur Bukele bëri propozimin që vendi i tij të mirëpresë qytetarët amerikanë, ai argumentoi se të ardhurat do të lejonin që sistemi i burgjeve të El Salvadorit të bëhej financiarisht i qëndrueshëm. Organizatat e të drejtave të njeriut kanë kritikuar vazhdimisht politikat e Bukele dhe kushtet që mbizotërojnë në burgjet e El Salvadorit , duke folur për një mori shkeljesh.
