U kritikua nga demokratët pas debatit me Trump, Joe Biden tërhiqet nga gara presidenciale 2024

Joe Biden

SHBA- Presidenti i Shteteve të Bashkuara Joe Biden u tërhoq të dielën nga gara presidenciale. Ai e njoftoi vendimin, pas thirrjeve të shumta në partinë e tij demokratë për të dalë nga gara pasi kishin humbur besimin tek aftësia e tij për të fituar ndaj rivalit republikan Donald Trump.

Me anë të një postim në platformën 'X', tha se ai do të mbetet në rolin e tij si president dhe komandant i përgjithshëm deri në përfundimin e mandatit të tij në janar 2025 dhe do t'i drejtohet kombit këtë javë me një fjalim.

"Ka qenë nderi më i madh i jetës sime të shërbej si presidenti juaj. Dhe ndërsa ka qenë qëllimi im të kërkoja rizgjedhjen, besoj se është në interesin më të mirë të partisë sime dhe të vendit që unë të tërhiqem dhe të fokusohem vetëm për përmbushjen e detyrave të mia si President për pjesën e mbetur të mandatit tim”, shkroi Biden.

Duke hequr dorë nga kandidatura e tij për rizgjedhje, Biden i hap rrugën zëvendëspresidentes Kamala Harris për të kandiduar në krye të demokratëve si gruaja e parë me ngjyrë që e bën këtë në historinë e SHBA-ve. Mediat e huaja shkruajnë se është e paqartë nëse demokratë të tjerë të lartë do ta sfidonin Harrisin për emërimin e partisë, ose nëse vetë partia do të zgjidhte të hapte fushën për nominime.

Njoftimi i Biden pason një valë presioni publik dhe privat nga ligjvënësit demokratë dhe zyrtarë të partisë për të lënë garën pas performancës së tij të dobët në një debat televiziv muajin e kaluar kundër rivalit republikan Donald Trump.

joe biden