Kryeministri Edi Rama ka pranuar se mes protestuesve të muajve të fundit kanë pasur edhe anëtarë, mbështetës dhe votues t&e...
BOTA
Ushtria amerikane kryen sulme të reja kundër Iranit, objektiv një bazë ushtarake
PiranjatPërditësimi i fundit 28 Maj 2026, 07:31
Ushtria amerikane ka ndërmarrë sulme të reja ndaj Iranit, duke goditur një objekt ushtarak në Bandar Abbas, qytet strategjik portual në jug të vendit, raporton BBC.
Komanda Qendrore e SHBA-së (CENTCOM) bëri të ditur se forcat amerikane rrëzuan gjithashtu katër dronë iranianë sulmues, të cilët sipas saj “përbënin kërcënim në zonën e Ngushticës së Hormuzit”.
Sipas CENTCOM, objekti në Bandar Abbas u godit në momentin kur po përgatitej të lëshonte një dron të pestë. Mediat iraniane raportuan se shpërthime të forta janë dëgjuar në lindje të qytetit.
Sulmet vijnë në një moment delikat, ndërsa mes SHBA-së dhe Iranit ekziston një armëpushim i brishtë dhe po zhvillohen negociata të gjata për t’i dhënë fund luftës tre-mujore, e cila ka bllokuar trafikun detar në Ngushticën e Hormuzit dhe ka ndikuar në rritjen e çmimeve globale të energjisë.
Kjo është hera e dytë brenda tre ditësh që SHBA godet objektiva në territorin iranian, duke deklaruar se operacionet janë kryer në kuadër të vetëmbrojtjes. Përshkallëzimi i ri i tensioneve rrezikon të dëmtojë armëpushimin ekzistues.
CENTCOM i përshkroi veprimet si “të matura, thjesht mbrojtëse dhe të destinuara për të ruajtur armëpushimin”.
Më herët gjatë kësaj jave, ushtria amerikane konfirmoi një tjetër valë sulmesh “vetëmbrojtëse” në jug të Iranit, ku u goditën baza raketore iraniane dhe mjete detare që sipas SHBA-së po përpiqeshin të vendosnin mina në Ngushticën e Hormuzit.
