Ish-ministri i Jashtëm, Ditmir Bushati ka reaguar për herë të parë në lidhje me protestat masive të të rinjve dhe qyteta...
BOTA
VIDEO dramatike nga tërmetet/ Pallati gjigant shembet brenda pak sekondash si “kullë prej rëre”
PiranjatPërditësimi i fundit 29 Qershor 2026, 18:12
Një video e re e publikuar të hënën kap momentet e agonisë që përjetuan qytetarët të mërkurën pasdite, kur një tërmet i dyfishtë me magnitudë të lartë goditi Venezuelën. Në pamje shihet se, sapo qytetarët ndiejnë lëkundjet, përpiqen të dalin jashtë për t'u mbrojtur. Megjithatë, dridhjet janë aq të forta sa shumica prej tyre nuk arrijnë të qëndrojnë në këmbë dhe rrëzohen në rrugë. Në të njëjtën kohë, një ndërtesë përballë tyre shembet brenda pak sekondash, si një kullë prej letre.
Ndërkohë, një tërmet pasues me magnitudë 4.6 të shkallës Rihter goditi të hënën në mëngjes veriun e Karakasit, duke shkaktuar shqetësim të ri në Venezuelë, pothuajse pesë ditë pasi dy tërmete të fuqishme shkaktuan shkatërrime të mëdha në vend.
Sipas Reuters dhe AFP, lëkundja u ndje pak pas orës 07:00 (me orën lokale), si në kryeqytetin Karakas ashtu edhe në qytetin bregdetar La Guaira. Në momentin e tërmetit pasues, ekipet e shpëtimit po vijonin operacionet për të gjetur të mbijetuar që mund të ishin ende të bllokuar nën rrënojat e ndërtesave të shembura nga tërmetet vdekjeprurëse të së mërkurës së kaluar.
Njëkohësisht, autoritetet vazhdojnë të shprehin shqetësim të madh për qëndrueshmërinë strukturore të qindra ndërtesave, të cilat janë dëmtuar rëndë nga lëkundjet fillestare dhe konsiderohen veçanërisht të rrezikuara nga tërmetet pasuese. Numri i viktimave vlerësohet të ketë arritur në të paktën 1,450 persona.
Pavarësisht bilancit tragjik, operacionet e shpëtimit kanë sjellë edhe disa histori shprese. Mes tyre janë shpëtimi i një foshnjeje dhe i një gruaje, të cilat u nxorën gjallë nga rrënojat pasi kishin qëndruar të bllokuara për më shumë se tre ditë.
Autoritetet shpresojnë se mbërritja e ekipeve shtesë ndërkombëtare të kërkim-shpëtimit, së bashku me ndihmat e tjera humanitare, do të forcojë operacionet në terren. /Piranjat News/
