Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
BOTA
VOA: Politikat e administratës së ardhshme për inteligjencën artificiale dhe kriptomonedhat
E.DPërditësimi i fundit 17 Janar 2025, 17:40
SHBA- Presidenti i zgjedhur Donald Trump thotë se dëshiron që Shtetet e Bashkuara të kenë rol udhëheqës në botë për inteligjencën artificiale dhe kriptomonedhat. Siç njofton korrespondentja e Zërit të Amerikës, Michelle Quinn, presidenti i zgjedhur ka emëruar për këtë qëllim një sipërmarrës dhe investitor në fushën e teknologjisë, në rolin e drejtuesit për inteligjencën artificiale dhe kriptomonedhat.
Presidenti i zgjedhur Donald Trump ka emëruar David Sacks-in në një post të ri në Shtëpinë e Bardhë, si drejtues për inteligjencën artificiale dhe kriptomonedhat.
Zoti Sacks është një sipërmarrës dhe investitor i hershëm në fushën e teknologjisë. Presidenti Trump thotë se ai pret që zoti Sacks të ndihmojë për t’i larguar Shtetet e Bashkuara nga ajo që ai e quan censurë dhe pozicionim ideologjik i kompanive të mëdha të teknologjisë.
Zoti Sacks do të ketë shumë për të bërë, thotë profesori i etikës në Universitetin e Santa Claras, John Pelissero.
“Do të ishte sfidë për këdo që të përpiqet të menaxhojë dy teknologji të reja dhe metoda financimi që po zhvillohen me shpejtësi”, thotë profesori Pelissero.
Zoti Sacks refuzoi një kërkesë për intervistë, por ai ka folur shpesh për nevojën për të kufizuar fuqinë e kompanive të mëdha të teknologjisë.
“Nuk do të kemi një ekosistem të shëndetshëm për kompanitë e reja. Nuk do të kemi lirinë e fjalës dhe nuk do të kemi konkurrencë mes shërbimeve të ndryshme për të ofruar një mjedis më novator”, tha zoti Sacks.
Ai ka folur edhe për potencialin e kriptomonedhave.
“Ajo që Bitcoin-i ofron është një tjetër lloj monedhe, që nuk garantohet nga qeveria, por nga matematika, nga kriptimi... Mendoj se me kalimin e kohës, shumë njerëz do të mendojnë se është një formë më e mirë e parasë”, tha zoti Sacks.
Agjencitë rregullatore në administratën e Presidentit Biden kanë shprehur shqetësime në lidhje me tregun e kriptomonedhave dhe rreziqet e mundshme financiare për investitorët.
Mbështetësit e kriptomonedhave ndihen të inkurajuar që Presidenti i zgjedhur Trump do ta ndihmojë me përparësi këtë sektor të ri të ekonomisë.
“Do të jetë shumë e rëndësishme të kemi dikë që mund të jetë në rol koordinues, për t’u siguruar që agjencitë e duhura komunikojnë me njëra-tjetrën dhe për të ndërhyrë nëse agjencitë nuk bien dakord për diçka”, thotë Kristin Smith, drejtuese e Shoqatës “Blockchain”.
Ndërsa profesori Pelissero thotë se mund të lindin probleme të etikës pasi zoti Sacks do të influencojë politikat, ndërkohë që firma e tij investon në kriptomonedha dhe tek inteligjenca artificiale.
“Do të jetë e vështirë për publikun që të dijë se do të veprohet në interesin e publikut nga administrata Trump kur të merret mepolitikat për inteligjencën artificiale dhe kriptomonedhat”, thotë profesori Pelissero.
Zoti Sacks do të jetë i angazhuar me kohë të pjesshme në rolin në Shtëpinë e Bardhë dhe emërimi i tij nuk ka nevojë për konfirmim nga Senati./VOA
