Ndarja e përgjegjësive për punët e shtëpisë mund të ndikojë edhe në kënaqësinë në çift...
BOTA
Vuçiç: U mbajt një protestë e madhe me energji dhe zemërim të jashtëzakonshëm ndaj autoriteteve serbe!
n.fPërditësimi i fundit 16 Mars 2025, 08:22
SERBI- Presidenti serb, Aleksandar Vuçiç në një mesazh publik ka reaguar pas përfundimit të protestës së organizuar mbrëmjen e djeshme në Beograd. Vuçiç gjatë fjalës së tij pranoi se protesta ishte e madhe por e qetë pasi nuk pati lëndime të rënda gjatë tubimit. Vuçiç shtoi se u mbajt një protestë e madhe me energji dhe zemërim të jashtëzakonshëm ndaj autoriteteve.
“Dua të shpreh kënaqësinë time në emër të të gjithë qytetarëve si President i Republikës që u mbajt një protestë e madhe me energji dhe zemërim të jashtëzakonshëm ndaj autoriteteve, dhe nuk pati lëndime të rënda. Në total, 56 persona u lënduan, por asnjë nuk u lëndua rëndë,” tha Vuçiç.
Ai shtoi se 22 persona u arrestuan për kryerjen e krimeve kundër pronës, për sulme ndaj oficerëve të policisë dhe personave të tjerë.
“Ushtarakët vlerësojnë se në protestë ishin 88,000 qytetarë, ndërsa policia vlerëson se ishin 107,000. BIA thotë se ishte diçka në mes. Një numër i madh njerëzish, një numër befasues i madh njerëzish, erdhën nga brendësia e Serbisë,” shtoi ai.
Vuçiç mohoi se ndonjë shërbim shtetëror të kishte përdorur një “top zëri” drejt protestuesve për të thyer heshtjen e tyre 15 minutshe në përkujtim të 15 viktimave të Novi Sadit.
“Ne nuk e ngritëm megafonin sot, oficerët e policisë vuajtën. Edhe pse disa do të thonë se nuk pati dhunë, se po të mos kishte traktorë rreth Parkut Pioneer, do të kishte derdhje gjaku,” theksoi ai.
Vuçiç më tej këmbënguli se protesta nuk ishte e lajmëruar, por sipas tij policia nuk ra në “kurthet” e zhvendosjes së protestuesve në lokacione të ndryshme të Beogradit.
Dje, 15 mars 2025 në Serbi është mbajtur protesta më e madhe kundër qeverisë së Aleksandër Vuçiç dhe Partisë së tij Progresive Serbe në pushtet. Ky është kulmi i pakënaqësisë së studentëve dhe qytetarëve të Serbisë me mënyrën se si autoritetet filluan të hetojnë tragjedinë në stacionin hekurudhor të Novi Sadit, ku një tendë u shemb dhe vrau pesëmbëdhjetë njerëz.
Protesta filloi me bllokada të kolegjeve dhe shkollave të mesme dhe ndalesa 15-minutëshe në vendkalimet e këmbësorëve nëpër qytetet serbe. Ndërsa qeveria progresive vazhdoi mbulimin e saj dhe bots-et e tyre filluan të sulmojnë këto protesta fillimisht të vogla, e gjithë kjo rezultoi të ishte lëvizje jashtëzakonisht e gabuar, sepse vetëm e forcoi rebelimin dhe protestat u bënë më të mëdha dhe më të forta. Protestat nuk janë mbajtur vetëm në Beograd por janë shtrirë në të gjithë Serbinë.
