Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Washington Post: Izraeli po përgatit planin e armëpushimit të Libanit si dhuratë për Donald Trump
E.DPërditësimi i fundit 15 Nëntor 2024, 16:15
IZRAEL- Izraeli po lëviz me shpejtësi për të arritur një marrëveshje armëpushimi në Liban, duke kërkuar t’i japë Donald Trump një fitore të hershme diplomatike ndërsa përgatitet të marrë presidencën e SHBA-së në janar të 2025. Sipas zyrtarit izraelit, Ron Dermer, ministri izraelit i çështjeve strategjike, diskutoi planin me Trump dhe dhëndrin e tij, Jared Kushner, gjatë një takimi në Mar-a-Lago përpara se të informonte zyrtarët e administratës Biden.
"Ekziston një mirëkuptim që Izraeli do t'i dhuronte diçka Trumpit ... se në janar do të ketë një mirëkuptim për Libanin," tha një zyrtar izraelit.
Zyrtari foli për The Washington Post në kushte anonimiteti për të diskutuar biseda të ndjeshme. Zyra e Dermer tha se ai diskutoi një gamë të gjerë çështjesh gjatë udhëtimit të tij, por nuk dha detaje. Ndërsa zyra e Netanyahut dhe një zëdhënës i Trump nuk pranuan të komentojnë.
Trump ka thënë se dëshiron t'i japë fund luftërave në Lindjen e Mesme, por ai gjithashtu i tha Netanyahut në një telefonatë muajin e kaluar që të bëni atë që duhet të bëni kundër Hezbollahut dhe Hamasit.
“Netanyahu nuk ka besnikëri ndaj Bidenit dhe do të përqendrohet tërësisht në favorizimin e Trumpit”, tha Frank Lowenstein, një ish i dërguar i posaçëm për negociatat izraelito-palestineze.
Po ashtu Netanyahu tha në një deklaratë të dielën se ai kishte biseduar me Trump tre herë ditët e fundit dhe se të dy panë mundësi të mëdha përpara për Izraelin, veçanërisht në avancimin e paqes. Kryeministri izraelit po planifikonte një epokë të re në Uashington shumë përpara ditës së zgjedhjeve më 5 nëntor.
Netanyahu kishte qenë në kontakt të rregullt me Trump, sipas zyrtarit izraelit, dhe Dermer me Kushnerin, i cili ndihmoi ndërmjetësimin e marrëveshjeve të normalizimit midis katër vendeve arabe dhe Izraeli gjatë mandatit të parë të Trump dhe mban lidhje personale dhe financiare me rajonin.
Kushner pritet të luajë një rol këshillues në rast të negociatave të ardhshme mbi normalizimin e Izraelit me Arabinë Saudite, edhe nëse ai nuk emërohet në një pozicion zyrtar në Shtëpinë e Bardhë, sipas një ish-zyrtari të Trump.
Zyrtari izraelit, tha se bisedat në rezidencën e Trump në Florida u përqendruan në një propozim izraelit për armëpushim për Libanin që përfshin bashkëpunimin perëndimor dhe rus. Ndërsa një zyrtar ushtarak izraelit tha se po krijoheshin plane për të rritur operacionet tokësore në Liban nëse bisedimet përfundimisht do të dështonin.
Izraeli, mes operacioneve të vazhdueshme ushtarake, synon të ruajë fuqinë ushtarake në rajon në rast të shkeljes së armëpushimit. Që nga tetori 2023, përleshjet me Hezbollahun kanë vrarë 45 civilë izraelitë dhe 31 ushtarë, ndërsa më shumë se 60,000 njerëz janë larguar nga shtëpitë e tyre në Izraelin verior.
Në Liban, kriza humanitare thellohet, me më shumë se 900,000 të zhvendosur dhe 3,300 të vdekur, sipas Ministrisë së Shëndetësisë të vendit. Pavarësisht përplasjeve, zyrtarët izraelitë besojnë se Hezbollahu është dobësuar, duke krijuar kushte të favorshme për kompromis.
Zyrtari tha më tej se Netanyahu mund të synojë një marrëveshje të përkohshme me Bidenin ende në detyrë, duke i lënë një zgjidhje përfundimtare Trumpit për të marrë kredinë.
“E vetmja gjë për të cilën Netanyahu kujdeset më shumë se Trump është politika e tij e brendshme dhe kthimi i civilëve izraelitë në veri është një objektiv madhor që ai mund të mos dëshirojë të presë”, tha ai.
