Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Zëdhënësi i Biden: Diagnostifikimi i kancerit të ish-presidentit u bë me të vërtetë javën e kaluar!
n.fPërditësimi i fundit 21 Maj 2025, 08:30
SHBA- Zëdhënësi i ish-presidentit amerikan ka konfirmuar se kanceri i prostatës nga i cili vuan Joe Biden u diagnostikua javën e kaluar. Ai shtoi se analiza e mëparshme e gjakut për të përcaktuar nëse ai vuan nga kjo sëmundje është bërë më shumë se dhjetë vjet më parë.
Zëdhënësi e bëri këtë sqarim ndërsa pasardhësi i tij, Donald Trump, dhe aleatët e tij nxisin atmosferën e dyshimit rreth fshehjes së mundshme të problemeve shëndetësore të ish-kreut demokrat të shtetit.
“Testi i mëparshëm i (ish-) Presidentit Biden për kancerin e prostatës ishte në vitin 2014. Përpara të premtes, (ish-) Presidentit Biden nuk i ishte diagnostikuar kurrë kanceri i prostatës”, këmbënguli zëdhënësi i tij në një njoftim për shtyp.
Shërbimet e Bidenit njoftuan të dielën se ish-presidenti, 82 vjeç, u diagnostikua disa ditë më parë me një formë agresive të kancerit të prostatës, i cili është metastazuar në kocka. Ky kancer është i nivelit 9 bazuar në klasifikimin Gleason, i cili vlerëson nivelin e agresivitetit të kancerit në një shkallë deri në 10.
Kanceri i prostatës është kanceri më i zakonshëm tek meshkujt. Është shkaku i dytë kryesor i vdekjes nga kanceri tek meshkujt. Për ta zbuluar atë, kryhet një analizë gjaku e njohur si PSA, e cila mat nivelet e antigjenit specifik të prostatës në gjak, ose një ekzaminim dixhital nga një urolog. Megjithatë, këto teste nuk lejojnë gjithmonë diagnozën e hershme.
Për më tepër, në SHBA, testimi i PSA-së nuk rekomandohet nga CDC, agjencia kryesore federale shëndetësore e vendit, për burrat 70 vjeç e lart që nuk shfaqin simptoma të sëmundjes, kryesisht për shkak të rrezikut të një rezultati "pozitiv të rremë" dhe trajtimeve të panevojshme.
Joe Biden ishte 71-72 vjeç në vitin 2014, kur bëri testin e tij të mëparshëm PSA, sipas zëdhënësit të tij. Shërbimet e tij nuk specifikuan nëse ai i ishte nënshtruar testeve të tjera të prostatës që atëherë. Dje, të martën, në SHBA u publikua një libër kërkimor, sipas të cilit Shtëpia e Bardhë e Bidenit i fshehu problemet e tij shëndetësore sepse ai dëshironte të rizgjidhej.
