Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
EDITORIAL
Klea Huta: Kandidatura e Florjan Binajt, shenjë se ky vend ende ka shpresë!
PiranjatPërditësimi i fundit 8 Tetor 2025, 17:48
Nga Klea Huta
Para gati tre vitesh vendosëm që kursit të madh të aktrimit në Klea Huta Academy t’i bashkohej Florian Binaj. Jo për emrin, jo për famën. Por sepse ndjeva që ai mund të sillte diçka ndryshe, frymë, pasion dhe një mënyrë tjetër për t’u prekur shpirtin fëmijëve tanë.
Qëllimi ynë ishte i thjeshtë: t’u mësonte si të krijonin karaktere, si të njihnin veten përmes aktrimit dhe në fund të vitit të përgatisnim bashkë një shfaqje të vogël për publikun e ngushtë. Por ajo që ndodhi s’e kishte parashikuar askush. Nuk ishte më një kurs. U kthye në një magji.
Fëmijët frymëzuan Florin për të shkruajtur veprën, Flori frymëzoi fëmijët për t’a luajtur. Prej asaj dite, shfaqja “Komshinjtë” nuk është ndalur asnjëherë. Një ide që nisi në një klasë aktrimi me adoleshentë, u kthye në një tur teatri që udhëton nëpër gjithë Shqipërinë, duke mbushur sallat plot dhe duke prekur zemra në çdo qytet.
Unë e kam vlerësuar gjithmonë Florin. Si mik, si koleg, por mbi të gjitha si njeri. Në çdo bashkëpunim e kam parë sa i drejtë është, sa shumë e do artin dhe sa respekt ka për njerëzit.
Si i ka mbijetuar sfidave të jetës reale, atë që jo të gjithë mund t’a shohin.
Flori është nga ata që nuk flet shumë, por kur flet, flet me shpirt. Flori nuk e përdor humorin për të fshehur ndjenjat, por për t’i zbutur, për t’i shëruar.
Është i pastër, i ndershëm. Një njeri që nuk kërkon lavdi, por kërkon kuptim.
Kur doli kandidatura e tij për kryetar bashkie, për mua nuk ishte surprizë. Ishte diçka që ndoshta e prisja prej kohësh, pa e ditur. Sepse gjithmonë e kam parë Florin si njeri që di të drejtojë. Nuk e shoh në politikë, e shoh në shërbim. Në frymë, në përkushtim. Për mua kjo kandidaturë është një shenjë që ky vend ende ka shpresë. Që nuk jemi mbyllur akoma mes të njëjtëve emra dhe të njëjtëve njerëz. Që dikush mund të dalë nga arti, nga jeta reale dhe të thotë: Unë dua të bëj diçka ndryshe.
Sepse ky vendi ynë ka nevojë për njerëz si ai. Njerëz si ti Flor. Të pa politizuar. Që nuk e shohin pushtetin si privilegj por si përgjegjësi. Që nuk flasin për t’u dukur por veprojnë për t’u dëgjuar nga ndërgjegjja e tyre.
