Ditën e Hënë vendi ynë parashikohet të ndikohe nga kushte atmosferike të qëndrueshme.
Moti parashikohet i kthjellët p...
EDITORIAL
Klodian Tomorri: As Jezu Krishti nuk duhej nga të gjithë
Nga Klodian TomorriPërditësimi i fundit 7 Tetor 2025, 11:20
Për çfarë votohet?
Ka një problem të vogël kjo puna e zgjedhjes së një kandidati. Edhe nëse cakton Papën e Romës, do të ketë gjithmonë njerëz kundër kësaj zgjedhjeje.
Disa, për shembull, mund të thonë se duhej zgjedhur Kalifi i Bagdadit, ose Dalai Lama. Por çështja është kjo: Për çfarë votohet në këto zgjedhje?
Dikush mund të thotë se votohet që qyteti të administrohet më mirë. Dikush tjetër mund të thotë se votohet që taksat të mos vidhen, e kështu me radhë.
Megjithatë, të gjitha këto, në Shqipëri, janë kot. Totalisht të parëndësishme.
Votuesi shqiptar konfirmoi në pushtet mazhorancën, ndonëse ishte plotësisht i informuar se si ajo vodhi 300 milionë euro me inceneratorin
E konfirmoi mazhorancën, ndonëse ishte i ndërgjegjshëm se një pjesë e madhe e aparatit të pushtetit është një rrjet 5D, ku paratë publike – pra taksat – rrëmbehen nga kompani që janë në pronësi të zyrtarëve që japin tenderat.
Pra, taksat, vjedhja, korrupsioni janë faktorë tërësisht të parëndësishëm në preferencën e votuesit shqiptar. Por për çfarë votohet, pra? Ka vetëm një arsye: për të kufizuar pushtetin absolut. Dhe kjo është një arsye ekzistenciale. Është përtej vjedhjes, përtej keqmenaxhimit, përtej skandaleve, përtej preferencave individuale për kandidatët.
Me pak fjalë, ata që thonë se opozita zgjodhi kandidat të dobët, pse zgjodhi këtë e jo atë, se me këtë humbasim dhe me atë fitojmë – i kanë thjesht argumentet kot.
I gjithë thelbi i këtyre zgjedhjeve është ky: duhet kufizuar pushteti absolut, apo jo? Nëse votuesi shqiptar mendon që jo, atëherë do të ishte një zgjidhje shumë racionale që Shqipëria të mos shkonte më në zgjedhje – të paktën në të ardhmen e parashikueshme.
Kjo do të kursente para, sepse faktikisht zgjedhjet në Shqipëri janë bërë tmerrësisht të shtrenjta. Do të kursente energji publike dhe do të krijonte "stabilitetin" që rrjedh nga pushteti i pakufizuar.
Kaq e thjeshtë është e gjitha kjo. Nuk është më çështje kandidatësh. Dikush pati thënë para disa kohësh se as Jezu Krishti nuk do të pranohej nga të gjithë. Dhe kjo thotë shumë.
