Gazetari Almer Toska ka publikuar një video-mesazh drejtuar Kryeministrit Edi Rama, në të cilin gazetari përdor tone të forta dhe dek...
EDITORIAL
Një Mimozë në shkretëtirën e kotësisë/ A munden zgjuarsia dhe karakteri të bëhen “virale”?
PiranjatPërditësimi i fundit 3 Prill 2026, 21:04
Unë quhem Koloreto Cukali dhe jam skenaristi i Piranjave. Dhe më duket shumë interesante ajo që po ndodh me Moza Ahmetin. Sepse në një kohë kur televizionet, reality show-t, talk show-t, talent show-t, të gjitha duken sikur kanë vetëm një objektiv, të prodhojnë klikime përmes sherrit, konfliktit dhe banalitetit, ja ku del një grua, shkrimtare, me dy-tri fjali inteligjente, me prezencë, me personalitet dhe e bën publikun të dashurohet me të.
Vetëm në 5 ditë!
Për mua, fenomeni Moza Ahmetit nuk ka të bëjë vetëm me lodhjen nga televizioni i keq, por edhe nga falsiteti. Ajo është kontrasti i madh edhe me showbiz-in shqiptar, aty ku gjithçka është një shtirje e madhe, ajo është vetvetja. Dhe pa u sforcuar.
Pa silikon.
Pa 1 milion fansa.
Pa foto gjysmë nudo në jahte të shtrenjta, pa na përplasur ballit luksin, shpesh të rremë, për të na treguar që vlen.
Ne e duam Mozën te “Ferma”, sepse na kujton se çfarë do të thotë të jesh e lirë. E lirë për të thënë atë që mendon, ashtu si e mendon.
Pa pasur frikë si do të gjykojnë, si do të komentojnë, a do të të sponsorizojnë dhe a do ta lejojnë pronarët?
Moza është shembulli, i përkohshëm e kalimtar (si të gjithë shembujt e mirë), se si do të ishte Shqipëria me më shumë artistë e më pak “modele”, influencerë e analistë në ekrane.
Jo se nuk ka artistë.
Por nuk janë të lirë.
Ne mund të kishim pasur më shumë “Moza” në këtë vend, por për fat të keq e humbën lirinë nëpër projekte bashkie e leje për të ekspozuar te “Kodi”.
A do ta ndryshojë televizionin ardhja e ikja e Moza Ahmetit?
Nuk besoj.
Problemi është shumë më i thellë.
Mënyra si konceptohet e drejtohet sot televizioni, si biznes edhe si financë, nuk lë vend për njerëz ndryshe; degradimi i arsimit dhe kulti i injorancës; apo mbështetja e artit vetëm nëse është në kopshtin qeveritar të gjitha këto nuk krijojnë hapësirë për të kultivuar mimoza.
Por unë shpresoj që, pas kësaj vale dashurie për Mozën, të paktën t’i shiten ca libra./Piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
