Elon Musk i shqetësuar nëse humb Trump në 2028: Demokratët do të hapin kufijtë, po erdhën në pushtet

Elon Musk ka shprehur shqetësimin për pasojat që mund të sjellë një fitore e demokratëve në zgjedhjet presidenciale dhe ato për Kongresin amerikan në vitin 2028, duke pretenduar se partia mund të ndërmarrë ndryshime që do t'i garantonin një avantazh të qëndrueshëm politik.

Në një postim në platformën X, më 30 tetor, Musk deklaroi se shqetësimi i tij kryesor lidhet me mundësinë që demokratët të fitojnë kontrollin e Dhomës së Përfaqësuesve, Senatit dhe Presidencës.

Sipas tij, nëse kjo ndodh, demokratët mund të ndërmarrin hapa për ta kthyer Uashingtonin dhe Porto Rikon në shtete, me synimin për të siguruar më shumë vende dhe një shumicë më të fortë në Senat.

“Shqetësimi im më i madh është se nëse demokratët fitojnë Dhomën e Përfaqësuesve, Senatin dhe Presidencën në vitin 2028, ata do ta bëjnë Uashingtonin dhe Porto Rikon shtete për të siguruar një shumicë të fortë në Senat”, shkroi Musk.

Biznesmeni amerikan pretendon gjithashtu se demokratët mund të ndjekin një politikë më të hapur migracioni, duke lejuar hyrjen e emigrantëve dhe duke u dhënë status ligjor personave që aktualisht qëndrojnë në SHBA në mënyrë të paligjshme. Sipas tij, një politikë e tillë do të synonte konsolidimin e mbështetjes elektorale për demokratët.

Ndërkohë, Musk u ka bërë thirrje ndjekësve të tij që të votojnë për republikanët, duke shprehur hapur mbështetjen e tij për këtë forcë politike përballë zgjedhjeve të ardhshme.

Deklaratat e tij vijnë në një kohë kur çështjet e emigracionit, përbërja e Kongresit dhe balancat mes republikanëve dhe demokratëve mbeten ndër temat kryesore të debatit politik në Shtetet e Bashkuara.