Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
SOCIALE
I ka mbijetuar të dy luftërave botërore/ Gruaja britanike 115-vjeçare shpallet 'personi më i vjetër në botë', kush është Ethel Caterham
m.lPërditësimi i fundit 2 Maj 2025, 09:00
ANGLI- Një grua 115-vjeçare britanike është bërë personi më i vjetër në botë, pasi mbajtësja e mëparshme e rekordit vdiq në prill. Sipas gazetës Independent, kjo është Ethel Caterham, e cila ishte gjallë edhe kur u fundos Titaniku dhe ka mbijetuar të dy luftërat botërore.
E lindur në vitin 1909, ajo është tani gruaja më e vjetër britanike e të gjitha kohërave dhe mban Rekordin Botëror Guinness, pasi paraardhësja e saj, murgesha braziliane Ina Canabarra Lucas, vdiq në moshën 116 vjeç më 30 prill. Ethel Caterham lindi në Hampshire dhe ishte e dyta më e vogël në një familje me 8 fëmijë.
Në moshën 18-vjeçare, ajo udhëtoi për në Indi dhe punoi si dado për një familje ushtarakësh, përpara se të kthehej në Mbretërinë e Bashkuar në vitin 1931, ku takoi bashkëshortin e saj, Norman Caterham . Ata u martuan në Katedralen e Salisbury-t në vitin 1933 dhe jetuan në Hong Kong dhe Gjibraltar, pasi burri i saj ishte ushtarak. Çifti kishte dy vajza dhe familja u kthye për të jetuar në Mbretërinë e Bashkuar para se Norman të vdiste në vitin 1976. Në atë kohë, çifti ishte martuar prej 40 vitesh.
Gjatë 50 viteve të fundit, Ethel ka jetuar në Surrey dhe ka tre mbesa dhe pesë stërnipër e stërmbesa. Gjatë një interviste që dha në vitin 2022, ajo deklaroi: Familja është gjëja më e rëndësishme në jetë, të jesh në gjendje të lësh kujtime për fëmijët dhe nipërit e mbesat e tua. Pronat nuk kanë rëndësi në fund të fundit, e tëra çfarë të duhet është dikush që të kujdeset për ty.
Ajo aktualisht banon në Shtëpinë e Kujdesit Lakeview, të cilën më parë e përshkroi për BBC-në si të mrekullueshme, dhe institucioni e ka nderuar duke i vënë emrin e saj njërit prej kopshteve të tij. E pyetur për sekretin e jetëgjatësisë së saj, Ethel tha: Unë kurrë nuk debatoj me askënd, dëgjoj dhe bëj atë që më pëlqen.
