Një kast i shkëlqyer me protagonist ikonën Pierce Brosnan, publikohet traileri i filmit 'Four Letters of Love'

SHBA- Është publikuar trejleri i filmit "Katër Letra Dashurie", një adaptim filmik i romanit me të njëjtin emër nga shkrimtari irlandez Niall Williams, i cili sjell në ekranin e madh një kast të shkëlqyer me protagonistë ikonikën Pierce Brosnan dhe karizmatiken Helena Bonham Carter. Filmi  do të dalë në kinema të zgjedhura amerikane përmes Quiver Distribution më 25 korrik, sipas "People".

Filmi, i cili debutoi vitin e kaluar në Festivalin e Filmit Britanik dhe Irlandez të Zelandës së Re, premton të eksplorojë kufijtë e dashurisë së vërtetë dhe provën e fatit. Në kastin kryesor përfshihen edhe Gabriel Byrne, Fionn O'Shea dhe Anne Skelly.

Në qendër të komplotit janë "Nikolas dhe Isabel, dy shpirtra binjakë që, megjithëse të destinuar për njëri-tjetrin, e shohin rrugën e tyre të dashurisë plot me vështirësi". Jeta e qetë e Nikolasit  përmbyset kur babai i tij ndjek një "shenjë hyjnore" dhe i përkushtohet pikturës, ndërsa bota e Izabelës shembet pas një tragjedie familjare dhe ajo dërgohet në një manastir. Megjithatë, për shkak të kthesave të paparashikuara të fatit, jetët e tyre ndërthuren përsëri në një ribashkim të mrekullueshëm.

Filmi është drejtuar nga aktorja britanike Polly Steele, ndërsa Douglas Cummins dhe Debbie Gray janë producentë. U filmua në Irlandë, duke përfituar nga bregdeti i bukur i ishullit. Brosnan ka një vit të ngjeshur këtë vit me serialin e Paramount+ “MobLand” dhe filmat “Black Bag”, “The Unholy Trinity” (në kinema më 13 qershor), “The Thursday Murder Club” (në Netflix më 28 gusht) dhe “Giant” (në kinema më 28 gusht).