50-vjeçari Thimjo Rubati, i plagosur pas një atentati mbrëmjen e së premtes në Sarandë, i transportuar mandej në spitalin...
INVESTIGIME
25 mijë euro për një lule “smart”/ Bashkia e Roskovecit tendera korruptiv për stacion elektrik vetëm për 4 makina. Bufi: Nuk e mbaj mend
PiranjatPërditësimi i fundit 12 Shtator 2025, 21:23
Më datë 22 janar 2025, Bashkia Roskovec hapi tenderin me fond limit 112 mijë e 500 euro për të instaluar 3 “smartfloëer” dhe për të ndërtuar stacion për makinat e elektrike bashkë me njësitë e karikimit.
Tenderi mbante flamurin e kuq për shkak të përjashtimit të pajustifikuar të kompanive që kishin bërë ofertën më të ulët.
Investigimi për këtë tender nisi në ditët e para të muajit prill, ku u vu re se nuk ishte e saktësuar data e lidhjes së kontratës. Ky tender kap vlerën e 112 mijë euro, para që hiqen nga buxheti i Bashkisë, grumbulluar nga taksat e qytetarëve.
Kaq shumë para paska Bashkia e Roskovecit?
Për më tepër që është një nga bashkitë, të cilat Ministria e Financave i klasifikon në listën e njësive vendore me “probleme financiare” për shkak të borxheve të larta që ka ndaj palëve të treta.
Një tjetër fakt që e bën korruptiv këtë tender janë çmimet e pajisjeve. Çmimi mesatar i një luleje “smart” është 25 mijë euro, prandaj për të blerë 3 të tilla do të duheshin në total 75 mijë euro, e nëse shtojmë dhe stacionin elektrik me vlerë maksimale 5 mijë euro, nuk do të nevojiteshin më shumë se 80 mijë euro.
Oferta fituese ishte ajo e kompanisë Albavia me vlerë 106 mijë euro pa tvsh, afërsisht 26 mijë euro më shumë se çmimi që këto pajisje kanë në internet!
Takimin me kryetaren e Bashkisë Majlinda Bufi, Piranjat e bënë më datë 8 prill, por në vend që ajo të jepte sqarime lidhur me këtë tender korruptiv, zgjodhi të thoshte vetëm togfjalëshat “Nuk e mbaj mend”, “nuk më kujtohet”, “vuaj nga humbja e kujtesës”…
Dy javë pas përballjes së gazetarit Freard Rista me zonjën Bufi, më 22 prill, u bë lidhja e kontratës mes Bashkisë dhe kompanisë Albavia, me kohëzgjatje 3 muaj, deri më 22 korrik, që në fakt rezultoi ditë jo shumë e mirë për kryetaren, pasi ishte thirrur në SPAK, për të tretën herë në pak kohë.
Gazetari Rista pati sërish një ballafaqim jashtë dyerve të SPAK-ut me të, lidhur me instalimin e këtyre pajisjeve, por edhe kësaj here Majlinda Bufi u shpreh se nuk mbante mend asgjë, duke lutur gazetarin të bënte verifikime në terren, ku nuk mungoi edhe ftesa për kafe, e cila u refuzua nga grupi i xhirimit, i cili udhëtoi në Roskovec për të parë nga afër nëse investimi ishte kryer apo jo.
Në hyrje të qytetit, pranë një lavazhi ndodhen katër karikues elektrikë, por nga biseda që gazetari zhvilloi me punëtorët atje, u zbulua se ato karikuesë ishin privat dhe jo të Bashkisë.
Për të shmangur konfliktin e interesit, gazetari Rista u interesua në të gjithë qytetin, duke pyetur qytetarë, punëtorë të bashkisë, policë, por të gjithë dëshmuan se Bashkia nuk kishte instaluar asgjë.
Piranjat u përballën sërish përpara Bashkisë me kryetaren e Roskovecit, Majlinda Bufi, më datë 26 gusht, më shumë se 1 muaj pas afatit përfundimtar të përmbushjes së tenderit, por ajo sërish nuk dha përgjigje shteruese, deri më datë 7 shtator, ku përmes një postimi në “Facebook”, njoftoi instalimin e tre luleve inteligjente në qytet, pa sqaruar se përse mungonte stacioni elektrik i karikimit të makinave. Dhe çfarë është më e rëndësishmja për t’u përmendur, është fakti se në Roskovec, referuar DPSHTRR-së janë vetëm 4 makina elektrike, një numër tërësisht i përballueshëm nga 4 karikuesit e privatit në hyrje të qytetit.
Ndaj lind pyetja: përse Bashkia Roskovec duhet të heqë mbi 100 mijë euro nga taksat e qytetarëve për një investim kaq të panevojshëm?
