Gazetari Osman Stafa ka publikuar pamjet nga kamera e sigurisë së një prej bizneseve në zonën e Medresesë, aty ku më herë...
INVESTIGIME
Rama premton Korridorin 8, Shqipëria 8 vite pas fqinjëve dhe miliona që përpihen nga tenderat e korrupsionit
PiranjatPërditësimi i fundit 8 Shtator 2025, 18:08
Kryeministri Edi Rama premtoi edhe gjatë takimit me Komandantin e Forcave Detare të Shteteve të Bashkuara në Europë dhe Afrikë, Admiralin Stuart B. Munsch, përfundimin e korridorit 8.
E vërteta është se Shqipëria ndodhet shumë mbrapa vendeve fqinj të rajonit për realizimin e këtij korridori për shkak të tenderave të dyshimtë. Autoriteti Rrugor Shqiptar ka kryer deri më tani një sërë tenderash për lotet e këtij korridori që lidh Shqipërinë me Maqedoninë e Veriut dhe më tej Bullgarinë.
Më nëntor 2022, Autoriteti Rrugor Shqiptar do të hapte sagën e Korridorit VIII për zgjerimin e aksit Elbasan-Qafë Thanë me vlerë totale 105 milionë euro.
Por fondet për një nga projektet më të rëndësishëm në 3 dekada do të njolloseshin nga “gara pa garë”. Konkretisht më 9 nëntor 2022, kompania “ALB-BUILDING” shpk shpallet fituese e tenderit “Zgjerimi i rrugës Elbasan- Qafë Thanë, (Faza 1)” me ofertë 2 miliardë e gjashtëqind e njëzet milionë lekë ose 26 milionë euro.
Disa muaj më pas, më qershor 2023, për fazën e dytë të zgjerimi të rrugës Elbasan- Qafë Thanë, ARRSH-ja do të shpallte fitues konsourciumin “4 A-M”, “ARKONSTUDIO”, “ELMAZAJ KONSTRUKSION” dhe “AGRI CONTRUCTION” shpk.
Një detaj interesant zbulohet nga dokumentat për të fituar tenderin, ku operatorët ekonomikë në një nga vitet 2019, 2020 dhe 2021, vlerën e xhiros për të paktën një nga vitet e kërkuara, duhet ta kenë jo më pak se 2 miliardë lekë. Por asnjëra nga kompanitë, as “ARKONSTUDIO”, as “ELMAZAJ KONSTRUKSION” dhe as “AGRI CONTRUCTION” shpk nuk kapin xhiron vjetore prej 2 miliardë lekësh ose 20 milionë euro për periudhën e kërkuar.
Por, ajo që dallohet një shkelje e hapur dhe absurde është një raport teknik, ku vetë ARRSH i komunikon firmës të mos kryejë disa nga punët e përcaktuara për mungesë fondesh.
Në fund të vitit 2023, ARRSH-ja do të shpallte fitues të fazës së tretë për zgjerimin e rrugës “Elbasan- Qafë Thanë”, kompanitë “2 T” dhe “HASTOÇI” me ofertë 2 miliardë e 537 milionë lekë ose 25 milionë euro.
Gara për këtë tender ka shfaqur indicie për favorizim të fituesit pasi të gjitha kompanitë konkurruese janë skualifikuar pasi nuk plotësojnë kushtin për të fituar tenderin.
Ndërkohë, tenderi për fazën e 4 për zgjerimin e këtij aksi, është fituar me ofertë fituese 2 miliardë e 500 milionë lekë ose 25 milionë euro nga kompania “A.N.K”, për të cilën SPAK-u ka nisur hetimet për tenderin e Ersekës. Kjo kompani nuk arrin xhiron vjetore, duke u bazuar te të dhënat e Open Data Albania.
Në total, deri tani ARRSH-ja ka tenderuar drejt kompanive 105 miliardë lekë ose 105 milionë euro. Nga këto fonde, 76 milion euro janë akorduar duke u skualifikuar të gjithë fituesit, për fazën 1, fazën 2 dhe fazën 3. Sipas Open Data Albania, këto tendera kanë indicie për korrupsion./Piranjat.al
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al, sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al, në të kundërt çdo shkelës do të mbajë përgjegjësi sipas nenit 179 të Ligjit 35/2016.
