50-vjeçari Thimjo Rubati, i plagosur pas një atentati mbrëmjen e së premtes në Sarandë, i transportuar mandej në spitalin...
INVESTIGIME
27-vjeçarja invalide, vëllai dhe babai e çojnë me Benz për të lypur në mes të Kamzës
n.fPërditësimi i fundit 21 Mars 2025, 22:22
KAMZË- Franci, një 25-vjeçar i cili banon në Fushë-Mzez, së bashku me babain e tij, çdo ditë pas orës 7 të mëngjesit, hipin në makinën Mercedes Benz vajzën e familjes, invalide, dhe e dërgojnë në Kamëz, e lënë në një trotuar përpara një pallati në ndërtim që ajo të sigurojë të ardhura duke lypur. Vëllai largohet, babai shkon në kafene ndërsa 27-vjeçarja qendron aty pavarësisht temperaturave të ulëta. Ndërkohë ne kthehemi në banesën e familjes dhe vëmë re se vëllai, ka mbërritur në shtëpi, çka na e shton më shumë dyshimin se ai nuk është në një marrëdhënie pune dhe përfiton nga të ardhurat e motrës. Dhe fatkeqëësisht kjo punë është e përditshme.
Gjatë bisedës që gazetari Freard Rista ka patur me vajzën, ka kuptuar që ajo ka vetëm probleme fizike dhe jo mendore, pasi ajo pyet, përgjigjet, flet, komunikon, logjikon si gjithë të tjerët. Kur pyetet nëse ka motra apo vëllezër, ajo thotë se ka një vëlla të vogël 8 vjeç, mirëpo nuk tregohet e sinqertë pasi Franci 25-vjeçar është vëllai i saj i vetëm.
Por e kuptueshme, bëhet fjalë për strategji, njerëzve duhet t’u vijë keq për të, vetëm kështu mund të përfitojë të holla. Ajo thotë se del rreth orës 8 dhe pasdreke ikën në shtëpi, ndërsa arsyeja e lypjes lidhet me nevojën financiare, mirëpo pavarësisht kësaj, kjo që po bëjnë pjesëtarët e kësaj familjeje, është e jashtëligjshme dhe duhet ndaluar. Jo me qëllimin për të ndëshkuar familjarët e vajzës, por për t’iu dhënë atyre një mësim të mirë. Ndaj, pasi dorëzuam të gjitha materialet që dispononim në Komisariatin e Kamzës, u përballëm mëngjesin e 21 shkurtit me Francin dhe babain e tij.
Franci fillimsht gënjeu duke deklaruar se do të largoheshin jashtë Tirane, por më pas e pranoi se motra del për “punë” pasi duhet të sigurojë të ardhura për vete dhe familjen, madje pretendon se ajo e ka zgjedhur vetë këtë variant. Në ato çaste efektivët e Komisariatit të Kamzës bënë shoqërimin e tij në ambientet e Policisë. Familja nuk e priti mirë këtë gjë, por më pas me ndihmën e psikologes Erisa Aliaj, arritën të arsyetojnë dhe së bashku u futëm në banesën e tyre, ku pamë se kushtet ishin vërtet për mbijetesë.
E reja pretendon se vëllai makinën e ka marrë vetëm për atë pasi është e sëmurë dhe e shoqëron në spital. Ndërsa nëna deklaron se të ardhurat e kësaj familje janë të pakta, ndaj janë detyruar të nxjerrin vajzën të lypë. Franci më herët thonë ato ka punuar, por janë bërë shkurtime në staf dhe ai ka mbetur pa punë. Gjatë bisedës kuptojmë se vajza ka mbetur invalide pasi 17 vite më parë është përplasur nga një automjet.
Një dramë brenda dramës historia e kësaj familje, e cila ka nevojë emergjente për të rregulluar sadopak jetesën. Pas këshillave të psikologes, grupi i xhirimit u largua. Franci qendroi disa orë në komisariat deri në përfundim të procedurave dhe iu bashkua familjes e cila priste në ambientet e jashtme. Ndërkohë, puna jonë në bashkëpunim me Policinë dhe Bashkinë për të sistemuar këtë familje, sapo ka filluar.
