Gazetari Osman Stafa ka publikuar pamjet nga kamera e sigurisë së një prej bizneseve në zonën e Medresesë, aty ku më herë...
INVESTIGIME
Skandali në IEVP Lushnjë/ Ky është tenderi me favorizime dhe korrupsion, për të cilin u arrestua sot Krenar Gozhina!
PiranjatPërditësimi i fundit 5 Shtator 2025, 20:37
Një grup punonjësish u hetua për shkelje dhe korrupsion në procedurat e tenderave publike për shërbime transporti në disa vite. Gjatë hetimeve u konstatua favorizim i operatorëve të caktuar dhe ushtrim presioni për rezultate të paracaktuara. Një nga të përfshirët u arrestua sot nga autoritetet.
Judmir Shurdhi, në cilësinë e titullarit të IEVP Lushnje në kohën e ngjarjeve, kreu veprat penale “Shpërdorimi i detyrës” dhe “Shkelje e barazisë së pjesëmarrësve në tendera apo ankande publike”, kryer në bashkëpunim, parashikuar nga nenet 248 dhe 258 e 25 të Kodit Penal.
Mariglen Myftari, Erjon Çela, Miranda Idrizi (punonjës të IEVP Lushnje) dhe Krenar Gozhina (ish-punonjës në IEVP Lushnje) kryen veprën penale “Shkelje e barazisë së pjesëmarrësve në tendera apo ankande publike”, kryer në bashkëpunim, parashikuar nga neni 258 e 25 i Kodit Penal.
Gjithashtu, Mariglen Myftari u akuzua për veprën penale “Korrupsioni pasiv i personave që ushtrojnë funksione publike”, parashikuar nga neni 259 i Kodit Penal. Xhesika Kaja u akuzua për veprën penale “Moskallëzim i krimit”, parashikuar nga neni 300, paragrafi i parë i Kodit Penal. Nga hetimi rezultoi se në procedurat e prokurimit me objekt: “Shërbim i transportit të punonjësve të rolit bazë” me fond limit 3,163,333 lekë në vitin 2018, dhe “Shërbimi i transportit të punonjësve me uniformë” me fond limit 3,395,800 lekë pa TVSH në vitin 2019, të zhvilluara nga Institucioni i Ekzekutimit të Vendimeve Penale, Lushnjë, u evidentuan shkelje ligjore të kryera, që përbënin elementë të veprave penale për të cilat u akuzuan.
Konkretisht, Judmir Shurdhi, në cilësinë e titullarit të autoritetit kontraktor, ngarkoi të njëjtët persona të ishin anëtarë të Njësisë së Prokurimit dhe Komisionit të Vlerësimit të Ofertave, miratoi shkeljet ligjore të kryera prej tyre në vitet 2018 dhe 2019, si dhe ushtronte presion ndaj vartësve të tij në vitin 2019 për kualifikimin e operatorit V.K., person fizik.
Anëtarët e Njësisë së Prokurimit dhe Komisionit të Vlerësimit të Ofertave kryen një sërë shkeljesh në kundërshtim me kuadrin ligjor në fushën e prokurimit publik, duke cenuar barazinë dhe lirinë e pjesëmarrësve në tendera me qëllim kualifikimin e operatorit ekonomik V.K., në bashkëpunim në vitin 2019 edhe me shtetasen Miranda Idrizi, anëtare e vetme e Komisionit të Shqyrtimit të Ankesave. Mariglen Myftari, në cilësinë e anëtarit të Njësisë së Prokurimit dhe Komisionit të Vlerësimit të Ofertave, në vitin 2019 kërkoi nga operatori ekonomik pjesëmarrës i vetëm në të dy procedurat e mësipërme të prokurimit një shumë parash me qëllim shpalljen e tij fitues dhe, në mungesë të përfitimit të kësaj shume, procedoi me skualifikimin e tij./piranjat.al
