Ndërsa vendet që mbështesin Kievin po shtojnë ndihmat e tyre ushtarake, Moska flet për një afrim të mundshëm me SHBA-n...
KOSOVA
I kërkuar për 14 vepra, i riu thotë se është i gatshëm të kthehet nga Serbia, por ka një kusht
PiranjatPërditësimi i fundit 24 Janar 2026, 21:04
Në tetor të vitit të kaluar, Edon Bytyqi u shpall në kërkim nga Policia e Kosovës. Ai dyshohet se ka kryer 14 vepra penale.
Sipas këtij institucioni, ai, përmes deklaratave të rreme dhe me qëllim përfitimin e paligjshëm, përdori emrat e figurave publike dhe zyrtarëve shtetërorë për të mashtruar qytetarët, duke i bindur ata të dërgonin para përmes institucioneve të transfertave financiare.
Bytyqi, me urdhër-arrest aktiv, dyshohej se ndodhej në Bosnjë e Hercegovinë. Megjithatë, në një intervistë për Insajderin, ai ka deklaruar se tash e pesë vjet gjendet në Serbi.
Ai ka thënë se po planifikon të kthehet në Kosovë dhe të dorëzohet në organet e drejtësisë, por me një kusht: dorëzimi dhe kalimi i kufirit do të bëhet vetëm nëse merr garanci se nuk do të torturohet nga policia.
Ai ka shtuar se një vendim të tillë e ka marrë pasi ndihet i penduar për dëmet që u ka shkaktuar njerëzve, të cilëve u ka marrë paratë duke i mashtruar.
Sipas tij, pas vuajtjes së dënimit, do t’i duhen vetëm dy vite për t’ua kthyer qytetarëve paratë e marra, gjë që ai ka premtuar se do ta bëjë.
Sa i përket motivit pse u përfshi në veprimtari të tilla, Bytyqi ka thënë se ka qenë nën ndikimin e narkotikëve. Ai ka deklaruar gjithashtu se në Serbi ndodhet në kushte të vështira, pa strehim dhe ushqim, duke vuajtur mungesën e familjes.
