Pas grumbullimit në sheshin “Skënderbej”, protestuesit kanë nisur marshimin drejt Kryeministrisë, duke vijuar protestën kun...
KOSOVA
Një vit nga sulmi terrorist në Banjskë, BE kërkesë Serbisë për arrestimin e “kokës” së komplotit
PiranjatPërditësimi i fundit 24 Shtator 2025, 19:08
Bashkimi Evropian deklaroi se pret nga autoritetet serbe të arrestojnë dhe të ndjekin penalisht autorët e sulmit terrorist në Banjskë, ndërsa ka shprehur shqetësim për pjesëmarrjen e disave prej tyre në protesta në Serbi.
Një zëdhënës i BE-së ka thënë për televizionin e pavarur serb N1, ka folur për vrasjen e një polici në Kosovë nga ky sulm.
“Dy vjet më parë, sulmi në Banjskë më 24 shtator 2023 nga sulmues të armatosur serb të Kosovës kundër policisë së Kosovës kërcënoi seriozisht sigurinë në rajon. Sulmi i shëmtuar atë ditë la një oficer policie të vdekur dhe dy të plagosur… Ne presim që autoritetet në Serbi të arrestojnë dhe ndjekin penalisht ata që gjenden në Serbi, me akuza të përshtatshme, para një gjykate në Serbi”, tha zëdhënësi i BE-së.
BE-ja u shpreh gjithashtu e shqetësuar për “raportimet mbi pjesëmarrjen e personave të dyshuar si autorë të sulmit në Banjskë gjatë demonstratave” në Serbi.
Sipas N1, në mesin e tyre është identifikuar Vlladimir Vuçetiç nga Mitrovica e Veriut, njëri nga 45 personat e përfshirë në aktakuzën e Prokurorisë Speciale të Kosovës, i cili u pa në një kamp protestues pro-regjimit në qendër të Beogradit.
Në listë mbetet edhe Millan Radoiçiç, ish-nënkryetar i Listës Serbe, i shpallur në kërkim ndërkombëtar nga Interpoli dhe i konsideruar përgjegjës për sulmin në Banjskë, i cili, siç raporton N1, së fundmi ka bërë kërcënime ndaj qytetarëve në Kosjeriç.
Zëdhënësi i BE-së kujtoi se në tetor 2023, Përfaqësuesi Special i BE-së në Kosovë kishte përcjellë një kërkesë të autoriteteve kosovare për asistencë juridike në drejtim të Serbisë, por “deri tani nuk është marrë asnjë përgjigje nga autoritetet serbe”.
“Ne presim që Serbia të bashkëpunojë plotësisht përmes kanaleve të asistencës juridike të ndërsjellë. Përfaqësuesja e Lartë e BE-së e ka ngritur personalisht këtë çështje me presidentin Vuçiq dhe do ta rikthejë në agjendë edhe në takimet me liderët e Ballkanit Perëndimor në Nju Jork”, tha BE-ja.
