Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
KOSOVA
"Është afruar pranë shtratit dhe e ka qëlluar"/ Prokuroria ngre aktakuzë ndaj shtetasit turk që vrau vajzën e tij me thikë
PiranjatPërditësimi i fundit 23 Tetor 2025, 11:32
Prokuroria Themelore në Prizren, Departamenti i Krimeve të Rënda, ka ngritur aktakuzë kundër M.G., shtetas turk, për shkak të dyshimit të bazuar mirë për kryerjen e veprës penale “Vrasje e rëndë” nga neni 173 par.1 nënpar. 1.3 e lidhur me pikën 1.11 të Kodit Penal të Republikës së Kosovës (KPRK).
Sipas aktakuzës, ngjarja ka ndodhur më 6 maj 2025, rreth orës 05:30 të mëngjesit, në rrugën “Shote Galica” në Prizren, në banesën ku i pandehuri jetonte me bashkëshorten dhe dy vajzat e tij. Në këtë ditë, M.G. ka privuar nga jeta vajzën e tij, Sh.G., në një akt të rëndë dhune.
Sipas hetimeve, pas përfundimit të ritualit të faljes së namazit, i pandehuri ka marrë një thikë kuzhine me gjatësi rreth 23 cm, të cilën familja e përdorte për prerjen e mishit, dhe është drejtuar në drejtim të dhomës ku ishin duke fjetur vajzat e tij. Kur viktima Sh.G. dhe vajza tjetër A.R. ishin në gjumë, i pandehuri është afruar pranë shtratit dhe ka sulmuar me thikë viktimën, duke e goditur në qafë.
Kur viktima ka filluar të bërtasë, A.R., vajza tjetër, është zgjuar dhe ka tentuar ta pengojë të pandehurin. Në atë moment, M.G. ka goditur edhe A.R. me të njëjtën thikë, duke i shkaktuar plagë të rënda në qafë.
Për shkak të klithmave të vajzave, bashkëshortja e tij, R.G., është zgjuar dhe ka hyrë në sallon, ku ka tentuar ta ndalojë M.G. Gjatë përleshjes që ka pasuar, R.G. ka pësuar lëndime në fytyrë dhe dorën e majtë, por ka arritur ta shtyjë bashkëshortin në dhomën e gjumit dhe ta mbyllë derën për të mundësuar telefonimin për ndihmë.
Pavarësisht përpjekjeve për të ndihmuar, Sh.G. ka ndërruar jetë në vendin e ngjarjes si pasojë e plagëve të marra.
Prokuroria ka ngritur aktakuzën dhe ka propozuar që M.G. të shpallet fajtor dhe të dënohet sipas ligjit, pas administrimit të provave dhe shqyrtimit gjyqësor.
