Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
KOSOVA
Vendimi i Kushtetueses për Kuvendin e Kosovës, BE kërkon formimin sa më shpejt të institucioneve të reja
PiranjatPërditësimi i fundit 1 Tetor 2025, 18:40
Shefi i Zyrës së Bashkimit Evropian në Kosovë, Aivo Orav, bën thirrje për formimin sa më të shpejtë të institucioneve të reja në vend.
Orav ka theksuar se po analizohet vendimi i Gjykatës Kushtetuese, e cila të mërkurën konstatoi se Kuvendi i Kosovës nuk është konstituuar për shkak të moszgjedhjes së nënkryetarit nga radhët e komunitetit serb.
“Ne, ashtu si njerëzit në Kosovë, e kemi marrë këtë informacion tash kohët e fundit, në të njëjtën mënyrë edhe bashkësia ndërkombëtare e mori po ashtu kohët e fundit dhe ne po e analizojmë për momentin.
Por sigurisht shpresa jonë është që Kuvendi të konstituohet sa më shpejt që të jetë e mundur dhe shpresojmë që të ketë një qeveri me mandat të plotë sa më shpejt që të jetë e mundur.”, ka thënë Orav për mediat.
Kur u pyet për mesazhin drejtuar partive politike, Orav u shpreh: “Ju lutem, konstituojeni Kuvendin dhe ju lutem formojeni qeverinë”.
Ndryshe, një ditë më parë Gjykata Kushtetuese njëzëri, ka konstatuar se seanca konstituive e Kuvendit, e filluar më 15 prill 2025 nuk ka përfunduar për shkak të moszgjedhjes së nënkryetarit të Kuvendit nga radhët e deputetëve të komunitetit Serb, dhe Kuvendi nuk është konstituuar në pajtim me përcaktimet e paragrafit 1 të nenit 66 [Zgjedhja dhe Mandati] dhe paragrafët 1 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës.
Kushtetuesja tutje ka urdhëruar që seanca konstituive e Kuvendit të përfundojë brenda afatit të përcaktuar me paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës dhe sipas Aktgjykimit të Gjykatës në rastet KO193/25 dhe KO196/25, përkatësisht brenda afatit të mbetur prej 12 ditëve nga hyrja në fuqi e këtij Aktgjykimi.
