Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
SHOWBIZ
Elon Musk kërkon që të bojkotohet Netflix, për shkak të filmave me tematikë komunitetin LGBT+
PiranjatPërditësimi i fundit 2 Tetor 2025, 15:24
Elon Musk, manjat i teknologjisë dhe aktualisht njeriu më i pasur në botë, ka shpërthyer kundër platformës së njohur të streamingut, Netflix. Përmes një postimi në rrjetin social X, ku ai numëron mbi 226 milionë ndjekës, Musk kërkoi që njerëzit të anulojnë abonimet e tyre, duke e justifikuar këtë si një masë në mbrojtje të “shëndetit të fëmijëve”.
Reagimi i tij erdhi pasi profile të djathta, përfshirë Libs of TikTok, shpërndanë fragmente nga seriali i animuar “Dead End: Paranormal Park” dhe deklarata të autorit të tij, Hamish Steele. Kritikët e serialit kanë vënë në pah se personazhi kryesor paraqitet si transgjinor, duke e cilësuar këtë si një mënyrë për t’i imponuar fëmijëve “ideologjinë pro-trans”.
“Anuloni Netflix-in”, shkroi Musk shkurt në një nga postimet, ndërsa më pas shtoi: “Mendoj se kjo nuk është e drejtë”. Ironikisht, seriali në fjalë është anuluar që në vitin 2023 dhe Netflix nuk e promovon më, sipas Variety.
Hamish Steele reagoi në rrjetin Bluesky, duke pranuar se pas postimeve të fundit ka marrë mesazhe shqetësuese. “Jam përpjekur ta marr me sportivitet dhe jam ndjerë mirë nga mbështetja e njerëzve. Por tashmë po më vijnë email-e jashtëzakonisht të shëmtuara, homofobike dhe antisemitike, që sinqerisht janë bërë frikësuese,” tha ai.
Ndërkohë, Libs of TikTok ka kritikuar edhe serialin tjetër të Netflix-it “CoComelon Lane”, ku shfaqet një djalë i vogël me fustan duke vallëzuar para dy prindërve të tij homoseksualë.
Musk, i cili prej kohësh ka pasur një marrëdhënie të tensionuar me vajzën e tij transgjinore, Vivian Jenna Wilson, e ka përdorur këtë rast për të akuzuar Netflix se po promovon një “agjendë të zgjuar” dhe përsëriti thirrjen e tij: “Anuloni Netflix për shëndetin e fëmijëve tuaj”.
