Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
LIFESTYLE
Sa hapa në ditë ju duhen për të jetuar më gjatë, zbulojeni tani
PiranjatPërditësimi i fundit 26 Tetor 2025, 14:48
Një studim i ri ka gjetur se numri i hapave të përditshëm mund të jetë shumë më kyç për shëndetin e grave më në moshë sesa frekuenca e ecjes. Edhe ecja e 4000 hapave në vetëm një ose dy ditë e ulë rrezikun e vdekjes në moshë më të re
Nëse disa ditë arrini më lehtë objektivin e ecjes dhe disa të tjera më pak, prapë se prapë mund të jeni duke mbrojtur shëndetin e zemrës dhe duke zgjatur jetën, sipas një studimi të ri.
Studimi, i udhëhequr nga doktori Rikuta Hamaya, instruktor në mjekësi në Brigham and Women’s Hospital dhe në Harvard Medical School, zbuloi se për gratë mbi 60 vjeç, mesatarja javore e hapave ishte më e lidhur me rrezik më të ulët të sëmundjeve kardiovaskulare dhe vdekjes së parakohshme sesa numri i ditëve kur arrihej objektivi ditor, ka raportuar CNN.
“Nivelet më të larta të aktivitetit fizik janë lidhur me jetë më të gjatë dhe më të shëndetshme. Por njerëzit kanë mënyra të ndryshme të lëvizjes, disa janë aktivë çdo ditë, ndërsa të tjerët kanë disa ditë më aktive se të tjerat. Studimi ynë tregon se rëndësi ka të lëvizësh më shumë gjatë javës, pavarësisht si i shpërndan hapat”, ka shpjeguar Hamaya.
Sa hapa mjaftojnë?
Nuk ka ndonjë numër magjik që garanton shëndet të mirë. Shumë persona ndjekin synimin e zakonshëm të 10 mijë hapave në ditë, por sipas doktorit Sean Heffron, profesor në New York University Langone Health, ky numër “nuk bazohet në prova shkencore të forta”.
Studiues të tjerë sugjerojnë se rreth 7,000 hapa në ditë mund të jenë të mjaftueshëm për të ulur rrezikun e sëmundjeve të zemrës, diabetit të tipit 2, kancerit, depresionit dhe vdekjes së hershme.
Por studimi më i fundit, i botuar në British Journal of Sports Medicine, u fokusua në efektet e niveleve të ndryshme të hapave te gratë rreth moshës 70-vjeçare.
Rezultatet:
-Gratë që ecnin të paktën 4,000 hapa një ose dy ditë në javë kishin 26 për qind rrezik më të ulët vdekjeje nga çdo shkak dhe 27 për qind rrezik më të ulët nga sëmundjet e zemrës, krahasuar me ato që nuk e arrinin këtë prag asnjëherë.
-Arritja e 4,000 hapave për tre ditë në javë ulte rrezikun e vdekjes nga çdo shkak me 40 për qind.
“Ky është një zbulim i rëndësishëm, sepse 4,000 hapa në ditë për dy ose tre ditë në javë është diçka e arritshme edhe për të moshuarit”, ka thënë Hamaya.
Edhe më shumë përfitime u vunë re kur pjesëmarrëset bënin 5,000 deri 7,000 hapa në ditë, por sipas studiuesve, ajo që ka më shumë rëndësi është mesatarja javore e hapave, jo nëse çdo ditë arrihet një objektiv i caktuar.
Si të lëvizni më shumë gjatë ditës
Të shtoni lëvizjen nuk do të thotë domosdoshmërisht të bëni ecje të gjata çdo ditë.
“Nëse përdorni autobusin, zbrisni një ose dy ndalesa më herët dhe ecni deri në destinacion. Kjo shton minuta aktivitet fizik pa ndryshuar shumë rutinën tuaj”, ka këshilluar doktori Heffron.
Ai shton se çdo minutë ecjeje “shtohet pak nga pak gjatë ditës dhe javës, duke përmirësuar shëndetin në mënyrë të qëndrueshme”.
Nëse ecja nuk është mënyra juaj e preferuar për të lëvizur, zgjidhni aktivitete që ju pëlqejnë, si vallëzimi, kopshtaria, lojëra ose shëtitjet.
Ndërkaq, për ata që kanë kufizime në ecje, Bishnu Pada Das, trajner personal nga India, sugjeron ushtrime ndërkohë që qëndroni ulur, si çiklizmi me duar ose ushtrime me karrige me ose pa pesha.
