Prezenca e OSBE-së në Shqipëri ka reaguar pas protestave të dhunshme dhe tensioneve që kanë përfshirë Tiranën gjat&...
POLITIKE
Al Jazeera: Protestat studentore në Shqipëri përshkallëzohen, flakët përfshijnë Ministrinë e Arsimit
PiranjatPërditësimi i fundit 15 Tetor 2026, 08:45
Protestat e studentëve shqiptarë kanë tërhequr vëmendjen e mediave ndërkombëtare. Al Jazeera raporton për përshkallëzimin e situatës në Tiranë dhe përplasjet e protestuesve me policinë. Në një artikull të publikuar, Al Jazeera bën me dije se protestat hynë në ditën e tretë, ndërsa gjatë natës së mëparshme një zjarr shpërtheu brenda godinës së Ministrisë së Arsimit, pasi protestuesit hynë me forcë në ndërtesë. Sipas policisë, përplasjet u shoqëruan me 16 arrestime të tjera.
Sipas Al Jazeeras, qindra studentë u mblodhën sërish të mërkurën në Tiranë, duke hedhur gurë drejt Ministrisë së Arsimit dhe duke kërkuar përmirësimin e kushteve universitare, si dhe dorëheqjen e kryeministrit Edi Rama. Policia ndërhyri me gaz lotsjellës dhe topa uji për të shpërndarë turmën, ndërsa protestuesit shkulën edhe barriera metalike dhe i përdorën për të bllokuar rrugët. Artikulli thekson se demonstratat e ditëve të fundit janë shoqëruar me përplasje dhe dëmtime në qendër të kryeqytetit.
Një pjesë e rëndësishme e artikullit i kushtohet lëvizjes së njohur si “Revolucioni i Flamingove”, e cila, sipas Besar Likmetës, redaktor në Rrjetin Ballkanik të Gazetarisë Investigative në Shqipëri, vjen pas katër muajsh tubimesh të përditshme në rrugët kryesore të kryeqytetit. Lëvizja nisi në shenjë kundërshtimi ndaj një projekti turistik në një zonë të mbrojtur në jug të Shqipërisë, të lidhur me Jared Kushner, dhëndrin e presidentit amerikan Donald Trump. Projekti ka nxitur reagime për shkak të dyshimeve për korrupsion dhe mungesës së transparencës, ndërsa protestuesit kanë kërkuar edhe dorëheqjen e kryeministrit Rama.
Media shkruan se protesta është zgjeruar gradualisht, duke kaluar nga kundërshtimi ndaj projektit turistik drejt kërkesave më të gjera për luftën kundër korrupsionit, më shumë mundësi për të rinjtë dhe përmirësimin e kushteve të jetesës. Ai vëren gjithashtu një ndjenjë në rritje të përjashtimit nga proceset politike mes brezit të ri shqiptar. Ndërkohë, studentët kanë deklaruar se shqetësimet e tyre lidhen drejtpërdrejt me kushtet në universitete, tarifat e studimit dhe mungesën e mbështetjes për të rinjtë.
