Policia ka dhënë detaje në lidhje me arrestimin e Jozefin Markut dhe personave që e shoqëronin në momentin kur dhunuan Eduart Ku...
POLITIKE
Berisha: Nuk kam fyer asnjë ambasador, i kërkoj sërish Gonzatos direktivën e BE për ligjin e barazisë gjinore
PiranjatPërditësimi i fundit 6 Nëntor 2025, 20:41
Duke folur në sallën e parlamentit, kryetari i Partisë Demokratike, Sali Berisha, ka reaguar pas mesazhit të komisioneres Marta Kos.
Berisha theksoi se nuk ka përdorur asnjë shprehje fyese ndaj ambasadorit të BE-së Silvio Gonzato, por vetëm ka kërkuar sqarime ligjore nga përfaqësuesi i BE-së në Tiranë, lidhur me bazën ligjore europiane që mbështet terminologjinë e “përkatësisë së shumëfishtë gjinore”.
Fjala e kreut të PD, Sali Berisha në parlament:
T’i përgjigjesh një shpifësi të denatyruar moralisht dhe në integritetin e tij njerëzor, nuk ia vlen të humbasësh kohë.
Por ajo që dua të them edhe njëherë, nuk kam bërë asnjë fyerje ndaj asnjë ambasadori, por kam shprehur mendimet e mia këtu, siç do t’i shpreh haptas në çdo rast.
Kam kërkuar nga ky parlament, dhe jashtë këtij parlamenti, nga ambasadori Gonzato, të na tregojë se cilën direktivë, se ai ka mbështetur këtë ligj dhe zonja Marta Kos deklaron se ai ka mbajtur qëndrimin e BE. Plotësisht dakord.
Por përsëri, cila direktivë e BE- BE funksionon me direktiva- cila direktivë e BE përdor terminologjinë e përkatësisë së shumëfishtë gjinore.
Ta shoh, ta di, sepse ekspertë të shquar që unë njoh, më kanë konfirmuar se asnjëra nga direktivat e BE nuk kanë këtë terminologji, por janë që të gjitha në binaritet,flasin për burrin dhe gruan.
Kjo është e tëra.
Çdo lloj interpretimi sui generis është problemi i atij që e bën.
Por unë përsëri dhe përsëri deklaroj këtu se jam kundër çdo forme diskriminimi dhe pabarazie, por jam në mënyrë kategorike kundër çdo përpjekje për të riformatuar antropologjinë njerëzore, binaritetin e gjinisë, Kushtetutën e Shqipërisë, kodet e vendit, të cilat sanksionojnë këtë binaritet si themel juridik të rendit kushtetues të Shqipërisë.
