Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
POLITIKE
Berisha: Pensionistët janë njerëzit më të shfrytëzuar, sepse paguajnë tre pensione taksa! Rama ka lënë vetëm 16 milionë euro për ju
ZH.LLPërditësimi i fundit 14 Dhjetor 2024, 13:35
Berisha
ELBASAN- Kryedemokrati Sali Berisha ka hedhur akuza ndaj qeverisë për mashtrim dhe vjedhje të buxhetit ndaj pensionistëve. Gjatë takimit me pensionistët në Elbasan, Berisha tha se fondet e pensioneve po mbeten të papërfillshme për shkak të keqmenaxhimit dhe abuzimeve në investime kapitale.
Berisha ka theksuar se pensionistët janë njerëzit më të shfrytëzuar sepse paguajnë tre pensione taksa shtetit. Sa i përket buxhetit, kryopozitari tha se qeveria po vepron në mënyrën më të pamëshirë kundrejt shtresave më të prekura.
"Çfarë pëson Shqipëria nëse vendos qeveria të kalojë 800 milionë fondin e pensioneve? Ua them ju pse nuk bëhet kjo, sepse për ju, për pensionistët kanë lënë 16 milionë euro, kanë parashikuar për vitin tjetër 17 milionë euro. Ku shkojnë këto? Këto vidhen në mënyrën më të pamëshirë. Si vidhen? Vidhen në ndërtim rrugësh me çmime 10 herë më të larta se Kroacia, që është standard i BE. E kam thënë dhe do ua them 100 herë, lexoni në Google, merrni rrugën në Kroaci, Bjelosik-Manastir, 17 kilometra rrugë, 27 metra e gjerë rruga, standard evropian, është ndërtuar me 27 milionë euro. I bie 1.6 milionë euro për km. Sa i bie për një km Edi Ramës dhe Belinda Ballukut? I bie nga 15 në 32 milionë euro në fushë. Këta janë të çmendur, këta nuk kanë kufi në vjedhje. Prandaj buxheti shkon 80 përqind investime kapitale dhe vjedhje kapitale. Nuk mbetet ajo, sigurisht. Po të veprosh në këtë mënyrë njerëzit të duken miza, njerëzit nuk ekzistojnë. Dhe kur e di që i ke vjedhur, të duken viktima dhe më keq. Kjo është arsyeja që ky njeri që i ra qark e tërthor nga Korça në Durrës, duke fajësuar njëherë opozitën, njëherë bizneset, në një kohë që dispononte në tavolinë për të shpërndarë buxhetin me 8.2 miliardë euro. Pra, kjo shpërndarje e të ardhurave është shpërndarja më e pamëshirë. Ne e kemi provuar në diktaturë, po Enver Hoxha i kthente në bunkerë në paranojën e tij, kurse këta i vjedhin për vete. Hyn i vëllai i Erion Veliajt me 100 euro në një kompani, na përfundon me 32 milionë euro xhiro kompania. Fitimet e kompanive të tyre, se tani çfarë ndodh? Ju pensionistë jeni njerëzit më të shfrytëzuar sepse paguani tre pensione taksa shtetit. Mos harroni këtë. Ku shkojnë këto? Këto shkojnë në një grusht kompanish që ndajnë paratë me qeverinë. Bëhet tenderi, shembulli, tuneli i Llogarasë, ofrohet kompani me 130 milionë euro, jo, thotë, nuk fiton. Përsëritet tenderi, fiton kompania me 180 milionë euro, e ndërton po kjo kompani që pruri 130 milionë euro. U them unë që në mënyrë absolute çdo tender në këtë mënyrë e bëjnë. Sill kaq ofertën ti dhe pastaj e ndajmë bashkë. Pastaj ku mbetet për pensionistët? Bëhet qameti po të shtojmë fondin tek pensionistët. Ky është cinizëm ekstrem. Plus tjetra, narko-eurot që vijnë me kontejnera, dhe ato pesë parë që u vijnë jashtë nga fëmijët, janë zhvlerësuar në masën 30-40 përqind.", u shpreh Berisha.
