Berisha publikon mesazhin e emigrantit: Pas fitores së 11 majit, dua të rikthehem në Shqipëri

TROPOJË- Kryetari i Partisë Demokratike, Sali Berisha ka zhvilluar ditën e sotme takimin përmbyllës elektoral në qytetin e Tropojës. Gjatë fjalimit të tij Berisha citoi mesazhin e një emigranti që kërkonte që pas fitores së 11 majit, të rikthehej në Shqipëri. Berisha tha se ai është i mirëseardhur dhe jo vetëm kaq.

Kryedemokrati shtoi se do të jetojnë 5 vite pa asnjë taksë dhe do ketë kredi për strehim duke shtuar se do paguajnë çdo çmim për ta rikthyer kombin në rininë e tij.

"Sot, një biznesmen nga Napoli më dërgonte një mesazh. Doktor thoshte, kam një sipërmarrje këtu, kam 100 punëtorë, kam prenotuar 2 autobusa, do vij bashkë me ta të votoj më 11 maj. Por unë, pas fitores dua të rikthehem. Dy rreshta i shkrova: 5 vjet, pa asnjë taksë. Je i mirëseardhur! Jo vetëm kaq. Po do ketë kredi për strehim. Do ketë kredi të buta për biznes. Do paguajmë çdo çmim për ta rikthyer kombin në rininë e tij. Për këta fëmijë, për këta të rinj. Do bëjmë gjithçka të shkollohen në shkolla më të mira. Do të dyfishojmë buxhetin për arsimin. Mësuesit do kenë rrogë minimale 1500 euro. Shkollat do të digjitalizohen tërësisht," tha Berisha.